فرانس نے کہا ہے کہ وہ گرین لینڈ میں ایک دستہ تعینات کرے گا تاکہ ڈنمارک اور کئی دیگر یورپی ممالک کے ساتھ مشترکہ "سرمائی مشق" میں حصہ لے سکے۔
فرانسیسی مسلح افواج کی وزارت کے مطابق، اس مشن میں ماؤنٹین وارفیئر یونٹس شامل ہوں گے، اور فوجیوں کی تعداد اور ان کے اصل مینڈیٹ کی تفصیلات صدر ایمانوئل میکرون کے سالانہ خطاب کے دوران اعلان کی جائیں گی، جو جمعرات کو جنوبی فرانس کے استریس ایئر بیس پر مسلح افواج سے کیا جائے گا۔
اس سے قبل ڈنمارک نے کہا تھا کہ وہ آج سے گرین لینڈ میں اپنی فوجی موجودگی کو مضبوط کرے گا اور مشق کی سرگرمیوں سے متعلق صلاحیتیں اور یونٹس تعینات کرے گا۔
سویڈن نے یہ بھی اعلان کیا کہ اس نے علاقے میں فوجی مشق میں حصہ لینے کے لیے افسران بھیجے ہیں۔
دریں اثنا ، جرمنی نے کہا کہ وہ جمعرات سے ہفتہ تک گرین لینڈ میں فوجی بھیجے گا، جو دیگر یورپی شراکت داروں کے ساتھ مل کر ڈنمارک کی حمایت کے لیے ایک "جاسوسی مشن" کا حصہ ہوگا۔
دوسری جانب ٹرمپ کا دعویٰ ہے کہ ڈنمارک روس اور چین کا مقابلہ نہیں کر سکتا۔
امریکی صدر ڈونلڈ ٹرمپ نے اصرار کیا ہے کہ گرین لینڈ امریکہ کی سرپرستی میں ہونا چاہیے تاکہ روس اور چین کے خطرات کا مقابلہ کیا جا سکے۔
ٹرمپ نے وائٹ ہاؤس میں صحافیوں کو بتایا کہ میں ڈنمارک پر بھروسہ نہیں کر سکتا کہ وہ خود کو روک سکیں گے،ہمیں قومی سلامتی کے لیے گرین لینڈ کی ضرورت ہے، اس لیے ہم دیکھیں گے کہ کیا ہوتا ہے،اگر ہم وہاں نہیں گئے تو روس اور چین آجائیں گے اور ڈنمارک اس بارے میں کچھ نہیں کر سکتا، لیکن ہم سب کچھ کر سکتے ہیں۔"
یہ بیانات امریکی نائب صدر جے ڈی وینس اور وزیر خارجہ مارکو روبیو، ڈنمارک کے وزیر خارجہ لارس لوکے راسموسن اور گرین لینڈ کی وزیر خارجہ ویوین موٹزفیلڈٹ کے درمیان وائٹ ہاؤس میں ملاقات کے بعد سامنے آئے۔
راسموسن نے ملاقات کے بعد ایک نیوز کانفرنس میں کہا کہ ہم نے واضح کر دیا ہے کہ یہ تاجِ ڈنمارک کے مفاد میں نہیں ہے ہم امریکی موقف تبدیل کرنے میں کامیاب نہیں ہو سکے ہیں اور یہ واضح ہے کہ صدر ٹرمپ گرین لینڈ پر فتح حاصل کرنے کی خواہش رکھتے ہیں ۔
تاہم، انہوں نے کہا کہ ڈنمارک اور امریکہ نے ایک اعلیٰ سطحی امور گروپ بنانے پر اتفاق کیا ہے تاکہ پیش رفت کے راستے تلاش کیے جا سکیں۔
