یوکرین

یوکرین نے اعلان کیا ہے کہ وہ آئندہ ہفتے استنبول میں روس کے ساتھ مزید مذاکرات میں شرکت کے لیے تیار ہے، لیکن اس نے دوبارہ مطالبہ کیا ہے کہ ماسکو امن کے لیے اپنی شرائط پر مبنی ایک دستاویز فراہم کرے۔

صدر وولودیمیر زیلنسکی کے چیف آف اسٹاف، آندری یرماک نے کہا، "یوکرین اگلی ملاقات میں شرکت کے لیے تیار ہے، لیکن ہم تعمیری بحث میں شامل ہونا چاہتے ہیں۔ اس کا مطلب ہے کہ روس کا مسودہ حاصل کرنا ضروری ہے۔"

یہ فوری طور پر واضح نہیں ہو سکا کہ آیا یہ بیان یوکرین کی شرکت کے لیے باضابطہ شرط ہے یا نہیں۔

یہ مطالبہ ایسے وقت میں سامنے آیا ہے جب اقوام متحدہ نے خبردار کیا  ہے کہ تین سالہ جنگ میں امن کی امیدیں "بمشکل" زندہ ہیں، اور دوسری طرف امریکہ نے دوبارہ کہا  ہےکہ وہ ثالثی کی کوششوں سے دستبردار ہو سکتا ہے اور روس پر مزید پابندیاں عائد کر سکتا ہے۔

یوکرین کا یہ بیان جمعرات کو روسی دعووں کے بعد سامنے آیا کہ وہ پیر کو استنبول میں مذاکرات کے ایک نئے دور میں شرکت کے حوالے سے کیف کی تصدیق کا منتظر ہے۔

سفارتی کوششیں حالیہ مہینوں میں تیز ہو گئی ہیں، لیکن روس نے یوکرینی علاقے پر بھاری بمباری جاری رکھی ہے اور فوری جنگ بندی کے مطالبات کو مسترد کر دیا ہے۔

ماسکو نے 2 جون کو استنبول میں براہ راست مذاکرات کے دوسرے دور کی پیشکش کی  تھی اور کہا تھاکہ وہ طویل مدتی امن معاہدے کے لیے اپنی شرائط کا ایک "میمورنڈم" پیش کرے گا۔

تاہم، یوکرین نے کہا ہے کہ جب تک اسے میمورنڈم کی ایک کاپی پیشگی نہیں ملتی، ملاقات بے معنی ہوگی۔

اس مطالبے کے جواب میں، کریملن کے ترجمان دمتری پیسکوف نے کہا کہ یوکرین کا مذاکرات سے پہلے دستاویز دیکھنے پر اصرار "منطقی  نہیں" ہے۔

یوکرین نے جواب میں کہا کہ اس نے پہلے ہی اپنا امن فریم ورک جمع کرایا ہے اور توقع کی ہے کہ ماسکو بھی ایسا کرے گا۔

زیلنسکی نے کہا، "روس ہر ممکن کوشش کر رہا ہے کہ ملاقاتیں بے نتیجہ ہوں۔ لہذا روس پر  مزید  پابندیاں اور دباؤ ہونا چاہیے۔"

یوکرینی وزارت خارجہ کے ترجمان جارجی ٹیکی نے کہا کہ ماسکو  کی طرف سے شرائط کو پیشگی پیش  کرنے سے انکار "ظاہر کرتا ہے کہ یہ ممکنہ طور پر غیر حقیقی الٹی میٹمز سے بھری ہوئی ہے۔"

دروازہ بند نہ کریں، ایردوان

صدر رجب طیب ایردوان، جو اگلے مذاکرات کی میزبانی کرنے والے ہیں، نے دونوں فریقوں پر زور دیا کہ وہ بات چیت پر "دروازہ بند نہ کریں"۔

آخری براہ راست مذاکرات، جو 16 مئی کو استنبول میں ہوئے تھے، صرف قیدیوں کے تبادلے اور رابطے میں رہنے کے مبہم وعدوں تک محدود رہے۔

جیسا کہ وزارت خارجہ کی ترجمان ماریا زاخارووا نے بتایا  ہے، روس پہلے کی طرح کا ہی وفد بھیجے گا، جس کی قیادت کریملن کے معاون ولادیمیر میڈنسکی کریں گے ۔

مئی کے مذاکرات کے بعد، یوکرین نے ماسکو پر غیر حقیقی مطالبات کرنے کا الزام لگایا، جن میں یوکرینی کنٹرول میں موجود علاقوں میں علاقائی رعایتوں کا مطالبہ شامل تھا۔

دریں اثنا، امریکہ نے جمعرات کو اقوام متحدہ کی سلامتی کونسل کو بتایا کہ یوکرین میں جنگ بندی کے لیے اس کی تجویز "روس کے لیے بہترین ممکنہ نتیجہ" ہے اور صدر ولادیمیر پوتن کو یہ معاہدہ قبول کرنا چاہیے۔

امریکہ چاہتا ہے کہ روس 30 دن کی جامع زمینی، فضائی، بحری اور اہم بنیادی ڈھانچے کی جنگ بندی پر متفق ہو۔

اقوام متحدہ کی سلامتی کونسل کو قائم مقام نائب امریکی سفیر جان کیلی نے بتایا، "ہم روس کے ساتھ کام کرنا چاہتے ہیں، بشمول اس امن اقدام اور ایک اقتصادی پیکج پر۔ اس تنازع کا کوئی فوجی حل نہیں ہے۔"

"اب جو معاہدہ پیش کیا جا رہا ہے وہ روس کے لیے بہترین ممکنہ نتیجہ ہے۔ صدر پوتن کو یہ معاہدہ قبول کرنا چاہیے۔"

یوکرین میں شہری ہلاکتوں میں اضافہ

اقوام متحدہ کے اعلیٰ حکام نے اس دوران یوکرین میں شہری ہلاکتوں میں اس سال ڈرامائی اضافے پر خبردار کیا، بڑھتے ہوئے تنازع کے درمیان فوری جنگ بندی اور فوری انسانی امداد کی اپیل کی۔

اقوام متحدہ کی سلامتی کونسل کے ایک اجلاس میں روزمیری ڈیکارلو نے کہا، "فروری 2022 میں روس کی یوکرین پر  حملوں کے آغاز سے اب تک کم از کم 13,279 شہری، جن میں 707 بچے شامل ہیں، ہلاک ہو چکے ہیں۔ تصدیق شدہ زخمی شہریوں کی تعداد 32,449 ہے، جن میں 2,068 بچے  ہیں۔"

انہوں نے نوٹ کیا کہ 2025 خاص طور پر مہلک رہا ہے، اور کہا: "اس سال کی پہلی سہ ماہی میں شہری ہلاکتیں 2024 کی اسی مدت کے مقابلے میں 59 فیصد زیادہ ہیں۔"