آذربائیجان کے حکام نے بتایا ہے کہ منگل اور بدھ کی درمیانی رات ایک اسلحہ ڈپو میں لگنے والی آگ کے نتیجے میں دھماکے شروع ہونے کے بعد 5 ہزار افراد کو وہاں سے نکال لیا گیا ہے اور کوئی جانی نقصان نہیں ہوا ہے۔

ہنگامی حالات، دفاع اور داخلہ کی وزارتوں کے مشترکہ بیان کے مطابق، یہ آگ مغربی ضلع گورانبوئے  کے گاؤں نظامی کے قریب واقع ایک ڈپو میں لگی۔

ہنگامی حالات اور دفاع کی وزارتوں کے عملے نے پولیس اور مقامی حکام کے ساتھ مل کر ایک آپریشن شروع کیا اور صورتحال کو قابو میں کر لیا ۔

گورانبوئے کے ڈپٹی ڈسٹرکٹ گورنر سیمور نزاروف  نے صحافیوں کو بتایا کہ نظامی اور اس کے  ہمسایہ گاؤں خوئلو  کے 5000 رہائشیوں کو قریبی علاقوں میں منتقل کر دیا گیا ہے۔

انہوں نے بتایا کہ آگ ابھی تک لگی ہوئی ہے اور وقفے وقفے سے دھماکوں کی آوازیں سنی جا رہی ہیں، تاہم آگ کو پھیلنے سے روکنے اور اسے بجھانے کے لیے کوششیں جاری ہیں۔

انہوں نے مزید کہا کہ کسی بھی گھر کو نقصان نہیں پہنچا اور نہ ہی کسی کی موت، زخمی ہونے یا کسی بڑے نقصان کی اطلاع ملی ہے۔

نزاروف نے کہا کہ دونوں دیہات کے داخلی اور خارجی راستوں پر سیکیورٹی کے سخت انتظامات کیے گئے ہیں اور نکالے گئے لوگوں کو محفوظ حالات میں پناہ دی گئی ہے۔