فلپائن میں 7،8 کی شدّت سے زلزلے کے جھٹکے محسوس کئے گئے ہیں۔

امریکہ جیولیجکل سروے 'یو ایس جی ایس'  کے مطابق زلزلے کا مرکز صوبہ 'سرنگانی' کے علاقے  'سوسس کسارگن' کے ضلع 'کالابان'  سے 26 کلومیٹر جنوب مغرب میں تھا۔

زلزلے کی شدّت 7.8 اور  زیرِ زمین گہرائی  55.2 کلومیٹر ریکارڈ کی گئی ہے۔

زلزلے کے بعد 4.6 سے 6.5 کی شدت کے 10 ضمنی جھٹکےریکارڈ کیے گئے ہیں اور متاثرہ  علاقے اور پڑوسی ممالک میں سونامی کے خطرے کی وارننگ جاری کر دی گئی ہے۔

فلپائن کے صدر کی سونامی وارننگ

زلزلے کے بعد فلپائن کے ادارہ برائے آتش فشانی پہاڑ و زلزلہ جات کے سربراہ 'ٹیریسیٹو باکولکول'  نے ایسوسی ایٹڈ پریس کے لئے جاری کردہ بیان میں کہا ہے کہ ملک کے سلطان قدرت اور سرنگانی صوبوں  میں قائم زمینی سونامی نگرانی اسٹیشنوں نے ایک میٹر بلندسمندری  لہروں کا مشاہدہ کیا ہے۔

فلپائن کے صدر فرڈیننڈ مارکوس جونیئر نے سونامی سے متاثر ہو سکنے والے علاقوں کے شہریوں سے فوری طور پر بلند مقامات پر منتقل ہونے کی اپیل کی ہے۔

مارکوس جونیئر نے کہا ہے کہ حکومت پوری طرح متحرک ہے اور تمام ہنگامی امدادی ادارے چوکس حالت میں  ہیں۔

ملائیشیا کے محکمہ موسمیات نے بھی جزیرہ بورنیو کے علاقے صباح کے لیے سونامی وارننگ جاری کی ہے۔ تاہم حکام نے بعد میں بتایا کہ زلزلے سے تقریباً پانچ گھنٹے بعد سونامی کا خطرہ کافی حد تک ختم ہو گیا تھا۔

سِول ڈیفنس آفس نے ابتدائی اطلاعات میں 4 افراد کے ہلاک اور 200 سے زائد افراد کے زخمی ہونے کی تصدیق کی  ہے۔

رپورٹوں کے مطابق زلزلے سے متعدد عمارتوں کو نقصان پہنچا اور جھٹکوں کے باعث ملک میں بعض پروازیں بھی منسوخ کر دی گئیں۔

زلزلے سے متاثرہ علاقے 'منداناو  'کے شہر ' ڈاواو'میں تمام تعلیمی سرگرمیاں اور کلاسیں معطل کر دی گئی ہیں۔

جاپان اور انڈونیشیا نے بھی سونامی وارننگ جاری کی

کویوڈو  خبر ایجنسی کے مطابق جاپان محکمہ موسمیات  نے بھی فلپائن کے زلزلے کے بعد بحرالکاہل کے ساحلی علاقوں کے لیے سونامی وارننگ جاری کی ہے۔

انتارا خبر ایجنسی  کے مطابق، انڈونیشی حکام نے خبردار کیا ہے کہ زلزلہ ملک کے ساحلی علاقوں میں سونامی کا سبب بن سکتا ہے، جس کے پیشِ نظر ابتدائی سونامی وارننگ جاری کی گئی ہے۔