اسرائیلی ذرائع ابلاغ  نے کہا ہے کہ اسرائیل، راکٹ حملوں کو روکنے کے لئے، لبنان کے  جنوبی دیہاتوں کی پہلی پٹّی پر قبضے کا پروگرام بنا رہا ہے۔

چینل 12 نے نشر کردہ خبر میں کہا ہے کہ اسرائیل کی  سیاسی قیادت فوج کو   لبنان کے اینٹی ٹینک میزائل فائر کرنے والے کسی بھی علاقے پر تاحکمِ ثانی قبضہ کرنے کا حکم دینے کا ارادہ رکھتی ہے ۔

چینل نے کہا ہے کہ "اسرائیل کا ارادہ ہے کہ اسرائیلی  آبادی کے لئے بننے والے  تمام علاقوں اور خاص طور پر جنوبی لبنان  میں دیہاتوں کی پہلی پٹّی  کو کنٹرول میں لے لیا جائے۔"

تاہم  چینل نے ان دیہاتوں کی نشاندہی نہیں کی جن پر قبضے کا پروگرام ہے۔

واضح رہے کہ اسرائیلی فوج نے،  نومبر 2024 سے ایک جنگ بندی معاہدہ نافذ  ہونے کے باوجود، حالیہ دنوں میں حزب اللہ کے ساتھ سرحد پار حملوں کے دوران لبنان بھر میں فضائی حملوں میں شدت پیدا کر دی ہے ۔

لبنانی حکام کے مطابق اسرائیلی حملوں میں2 مارچ سے تاحال  کم از کم 968 افراد ہلاک اور 2,432 زخمی ہو چکے ہیں۔

موجودہ کشیدگی ایران کے خلاف ، امریکہ۔اسرائیل مشترکہ کارروائی کے بعد شروع ہوئی ہے اور 28 فروری سے تاحال  تقریباً 1,300 افراد  کی ہلاکت کا سبب بن چُکی ہے۔

تہران نے ڈرون اور میزائل حملوں کے ذریعے جوابی کاروائی کی اور  اسرائیل کے علاوہ اردن، عراق اور خلیجی ممالک کو بھی نشانہ بنایا ہے۔  

ایران کا کہنا ہے کہ یہ حملے ’امریکی فوجی اثاثوں‘ کو ہدف بنا  رہے ہیں۔