امریکی صدر ڈونلڈ ٹرمپ نے دعویٰ کیا ہے کہ واشنگٹن اور بیجنگ کے درمیان تجارتی معاہدہ طے پا گیا ہے جو دونوں ممالک کے صدور کی حتمی منظوری سے مشروط ہے۔
بدھ کے روز ٹروتھ سوشل پر ایک پوسٹ میں انہوں نے کہا کہ امریکہ کو "مجموعی طور پر 55 فیصد اور چین کو 10 فیصد محصولات مل رہے ہیں۔
انہوں نے مزید کہا کہ اسی طرح ہم چین کو وہ فراہم کریں گے جس پر اتفاق کیا گیا تھا، جس میں ہمارے کالجوں اور یونیورسٹیوں کا استعمال کرنے والے چینی طالب علم بھی شامل ہیں ۔
بعد ازاں ٹرمپ نے کہا کہ وہ اور چینی صدر شی جن پنگ چین کو امریکی تجارت کے لیے کھولنے کے لیے مل کر کام کریں گے۔
امریکی اور چینی حکام نے رواں ہفتے لندن میں ملاقات کی تھی جس میں محصولات کے معاملے پر تبادلہ خیال کیا گیا تھا، نایاب دھاتوں کی برآمدات کا مسئلہ لندن میں ہونے والے مذاکرات میں ایک اہم نکتہ تھا۔
اس سے قبل اپریل میں امریکا نے چین پر بھاری محصولات کا نفاذ شروع کیا تھا لیکن مئی میں امریکا اور چین نے ابتدائی 90 روز کے لیے تادیبی محصولات کو وسیع پیمانے پر واپس لینے پر اتفاق کیا تھا۔
