جرمنی،امریکی کمپنی لاک ہِیڈ مارٹن سے  15 عدد اضافی 'ایف-35' لڑاکا طیارے خریدنے کی تیاری کر رہا ہے۔

روزنامہ در اشپیگل نے، بنڈسٹیگ کی مالیاتی کمیٹی کو پیش کردہ خفیہ بجٹ دستاویزات کے حوالے سے، شائع کردہ خبر میں کہا ہے کہ جرمنی امریکی کمپنی لاک ہِیڈ مارٹن سے مزید 15 عدد ایف۔35 خریدے گا۔اس منصوبہ بند خریداری کی لاگت کا تخمینہ 2.5 ارب یورو  لگایا گیا ہے اور یہ خرید برلن کے   پہلے سے موجود 35 عدد ایف-35 طیاروں کے آرڈر کے علاوہ  کی جا رہی ہے۔ اضافی خرید کا مقصد  ملک کے پرانے ٹورنیڈو طیاروں کے بیڑے کو تبدیل کرنا ہے۔بیڑے میں تبدیلی کے منتظر طیاروں  میں  امریکی جوہری بم اٹھانے کے اہل  اور جرمنی میں  ذخیرہ کئے گئے طیارے بھی شامل ہیں۔

بیڑے میں طیاروں کی تبدیلی کی تجویز وزیر دفاع بورس پسٹوریئس نے پیش کی ہے اور  جرمنی کی فوجی جدیدیت مہم کو مزید گہرا کرنے کی علامت ہے۔اس  تبدیلی مہم کو ، یوکرین جنگ کے بعد ،دفاعی اخراجات میں بڑے پیمانے پر اضافے سے تقویت دی گئی ہے۔

یورپ کا، تاخیر کا شکار،لڑاکا طیارے کا منصوبہ

قبل ازیں برلن نے  اضافی خریداری کے منصوبوں کی تردید کی تھی لیکن حکام کا کہنا ہے کہ بڑھا ہوا  دفاعی بجٹ مزید خریداری کے لیے گنجائش فراہم کرتا ہے۔ تاہم، اس خرید سے یورپ کے اپنے نئی نسل لڑاکا طیاروں کے منصوبے 'فرینکو۔جرمن فیوچر کامبیٹ ایئر سسٹم منصوبے' کو نقصان پہنچنے کے احتمال کی وجہ سے، فرانس کے ساتھ نئے تنازعات جنم لے سکتے ہیں۔

اضافی ایف۔35 طیاروں کی منظوری کی صورت میں اگرچہ جرمنی کے، نیٹو اتحادیوں اور  خاص طور پر امریکہ کے ساتھ مل کر، کام کرنے کی امکانات میں اضافہ ہو  گا  لیکن اس کے ساتھ ساتھ  ملک کا امریکی دفاعی ٹیکنالوجی پر انحصار بھی مزید پختہ ہو جائے گا۔