ترکیہ کا سیاحتی شہر 'انطالیہ'، بین الاقوامی  سالانہ تقویم کے اہم ترین فورموں میں سے ایک میں شرکت کے لئے دنیا بھر کے رہنماوں، وزراء اور اعلیٰ حکام کے اجتماع کے ساتھ،  اپریل میں ایک بار پھر عالمی سفارت کاری کا مرکز بننے جا رہا ہے ۔

"مستقبل کی تشکیل، غیر یقینی صورتحال کا انتظام" کے مرکزی خیال کے ساتھ متوقع  'انطالیہ ڈپلومیسی فورم' ADF26'عالمی عدم استحکام سے نمٹنے اور بین الاقوامی سفارت کاری کے مستقبل کو سمت دینے کے لیے قائدین کو ایک پلیٹ فارم پر لائے گا۔

پانچواں انطالیہ ڈپلومیسی فورم 17 سے 19 اپریل کی تاریخوں میں  انطالیہ میں منعقد ہوگا۔ 2021 میں اپنے آغاز کے بعد سے، یہ فورم مکالمے، تعاون اور اعلیٰ سطحی سفارتی رابطوں کے لیے دنیا کے نمایاں ترین پلیٹ فارموں میں سے ایک کی حیثیت حاصل کر چُکا  ہے۔

رواں سال کے فورم میں 150 سے زائد ممالک کے نمائندوں کی شرکت متوقع ہے۔شرکاء میں سربراہان مملکت، وزراء اور بین الاقوامی تنظیموں کے اعلیٰ حکام شامل ہوں گے۔  ترکیہ وزارت خارجہ  ذرائع کے مطابق فورم میں 20 سے زائد صدور، 15 نائب صدور اور 50 سے زائد وزرائے خارجہ کی شرکت متوقع ہے۔

توقع ہے کہ یہ فورم بین الاقوامی تنظیموں کے تقریباً 75 نمائندوں سمیت 460 سے زائد اعلیٰ سطحی شرکاء اور تقریباً 5 ہزار مہمانوں کو یکجا کرے گا۔ ذرائع کے مطابق ADF26 میں وسیع جغرافیائی نمائندگی ہوگی اور شرکت کرنے والے سربراہان مملکت میں سے تقریباً نصف کا تعلق افریقہ اور یورپ سے ہوگا۔ وزرائے خارجہ میں 40 فیصد افریقہ، 35 فیصد یورپ اور 22 فیصد ایشیا سے ہوں گے۔

درجنوں نشستوں میں عالمی مسائل پر بحث ہوگی

پروگرام میں 40 سے زائد نشستوں اور قائدین کی سطح کے پینل مباحثے شامل ہوں گے جن میں عالمی تبدیلیوں، غیر یقینی صورتحال اور بدلتے ہوئے علاقائی توازن پر بات کی جائے گی۔ مباحث اور ملاقاتوں میں بدلتے ہوئے عالمی نظام کو تشکیل دینے والے سیاسی، معاشی، ماحولیاتی اور تکنیکی چیلنجوں  کا بھی جائزہ لیا جائے گا۔

فورم کے ضمنی اجلاس میں بلقان امن پلیٹ فورم، غزہ، ترک ریاستوں، اور ترکیہ، پاکستان، سعودی عرب اور مصر کی شرکت سے ایک اہم چہار فریقی اجلاس نمایاں رہیں گے۔