امریکی وزیر دفاع پیٹ ہیگسیتھ نے ایشیائی حلیف ممالک پر زور دیا ہے کہ وہ چین کی بڑھتی ہوئی طاقت کا مقابلہ کرنے اور خطے میں اس کے غلبے کو روکنے کے لیے دفاعی اخراجات میں اضافہ کریں، اور کہا کہ چین کی تیزی سے فوجی تیاری تشویش ناک  ہے۔

ہیگسیتھ نے ہفتہ کو سنگاپور میں منعقدہ دفاعی رہنماؤں، افواج اور سفارت کاروں کے لیے ایشیا کے ایک اہم فورم شانگری-لا ڈائیلاگ میں گفتگو کرتے ہوئےکہا کہ مضبوط اور زیادہ خودمختار حلیف روک تھام کے لیے کلیدی حیثیت رکھتے ہیں۔

انہوں نے کہا کہ چین کی تاریخی فوجی توسیع اور خطے اور اس سے باہر اپنی فوجی سرگرمیوں کے پھیلاؤ کے بارے میں بجا تشویش موجود ہے۔

ہیگسیتھ نے کہا کہ کسی بھی بالا دستی والی طاقت کے زیرِ اثر پیسیفک علاقائی توازنِ طاقت کو بکھیر دے گا۔کسی بھی ریاست، بشمول چین، کا اختیار نہیں کہ وہ بالا دستی مسلط کرے اور ہمارے ملک اور ہمارے حلیفوں کی سلامتی کو موردِ سوال بنائے۔

پینٹاگون کے سربراہ نے کہا کہ امریکہ توقع کرتا ہے کہ اس کے ایشیائی حلیف اور شراکت دار اپنے دفاعی خرچ کو جی ڈی پی کا 3.5 فیصد تک بڑھائیں گے، جبکہ امریکہ نے اپنی فوجی صلاحیت میں 1.5 ٹریلین ڈالر کی سرمایہ کاری کا وعدہ کیا ہے۔

کوئی مفت خور نہیں

ہیگسیتھ نے زور دیا کہ حلیف کشیدگی نہیں بلکہ استحکام چاہتے ہیں۔

جو وہ چاہتے ہیں، اور جو امریکہ فراہم کرتا ہے، وہ نظم و ضبط والی طاقت، ثابت قدم عزم، اور ایسی قیادت ہے جو اعتماد کے ساتھ نرم لہجے میں بات کر سکے مگر بڑے ڈنڈے کے ساتھ چلنے کی صلاحیت بھی رکھتی ہو۔

ہیگسیتھ نے مزید کہا کہ بیجنگ کے ساتھ تعلقات کئی سالوں کے مقابلے میں بہتر ہیں اور اس کی وجہ فوجی سطح پر رابطوں میں اضافہ  ہے۔

ہم اپنے چینی ہم منصبوں سے اکثر و بیشتر  ملاقاتیں کر رہے ہیں اور فوجی  رابطوں کے کھلے راستے برقرار رکھے ہوئے ہیں۔

صدارتی عہدہ سنبھالنے کے بعد امریکی صدر ڈونلڈ ٹرمپ نے مطالبہ کیا ہے کہ حلیف دفاعی اخراجات بڑھائیں اور واضح طور پر کہا ہے کہ یورپی اور نیٹو کے شراکت داروں کو واشنگٹن پر انحصار کم کرنا چاہیے۔

ہیگسیتھ نے کہ امریکہ کی جانب سے امیر ممالک کے دفاع کی سبسڈی دینے کا دور ختم ہو چکا ہے، ہمیں اب  شراکت دار چاہئیں۔

جب تک ہر کوئی اپنے حصہ کا ذمہ دار نہیں بنتا، ہمارا اتحاد مضبوط نہیں ہوگا۔ کوئی مفت خور ی نہیں چلے گی۔