لبنانی میڈیا نے منگل کو رپورٹ کیا ہے کہ جاری جنگ بندی کے باوجود لبنان پر تازہ اسرائیلی حملوں میں ایک ڈینٹسٹ (دندان ساز) اور ان کے دو بچوں سمیت کم از کم آٹھ افراد جاں بحق ہو گئے ہیں۔

ایکسیوس کی رپورٹ کے مطابق، یہ نئے حملے امریکی صدر ڈونلڈ ٹرمپ کی جانب سے پیر کو اسرائیلی وزیر اعظم بن یامین نیتن یاہو کے ساتھ ایک  فون  رابطے کے فوراً بعد ہوئے، جس میں انہوں نے نیتن یاہو پر لبنانی علاقوں پر حملے اور ان پر قبضہ بند کرنے کے لیے زور دیا تھا۔

ٹرمپ نے واضح کیا تھا کہ انہوں نے حزب اللہ کے ساتھ بات چیت کے لیے ثالثوں کا استعمال کیا ہے اور انہیں یقین دہانی کرائی گئی ہے کہ دونوں طرف سے "ہر قسم کی فائرنگ روک دی جائے گی"۔

لبنان کی نیشنل نیوز ایجنسی نے ٹرمپ کے اعلان کے بعد کی پیش رفت کا حوالہ دیتے ہوئے بتایا کہ ایک اسرائیلی حملے میں، جب ایک اسرائیلی ڈرون نے جنوبی لبنان میں نبطیہ-خردلی شاہراہ پر ایک گاڑی کو نشانہ بنایا جس میں  ایک دندان ساز  اور اس کے دو بچے ہلاک  ہو گئے۔

ایک اور ڈرون حملے میں جبعشیت کے قصبے میں ایک پودوں کی نرسری کے اندر کام کرنے والے دو شامی کارکن ہلاک ہو گئے۔

ایجنسی کے مطابق، تول میں ایک موٹر سائیکل اور انصار میں ایک کار پر ہونے والے ڈرون حملوں میں مزید دو افراد جاں بحق ہوئے۔

ایک اسرائیلی ڈرون نے حاروف-طول چوراہے پر بھی ایک کار کو نشانہ بنایا، جس سے اس کا ڈرائیور ہلاک ہو گیا۔

اسرائیلی طیاروں نے کفر سیر قصبے میں مصل روڈ پر واقع لبنانی سول ڈیفنس کے ایک مرکز پر بھی فضائی حملہ کیا، جس سے وہ عمارت تباہ ہو گئی۔

این این اے (NNA) کے مطابق اس مرکز کو چند روز قبل ہی خالی کرایا گیا تھا۔