روس نے ہفتہ کو شمال مشرقی پولتاوا اور خارکیف علاقوں میں یوکرینی توانائی کمپنی نافٹوگیس  کی پیداواری تنصیبات پر بالیسٹیک میزائل اور ڈرون داغے، جن سے نقصان پہنچا ۔

دریں اثنا صدر وولودیمیر زیلنسکی نے کہا کہ رات کے وقت یوکرینی ساختہ فلیمِنگو میزائلوں نے روس کے ولگوگراد علاقے میں توپ خانے کے نظام اور میزائل لانچ کے اجزاء تیار کرنے والی ایک فیکٹری کو نشانہ بنایا۔

یہ تازہ  حملہ جمعہ کے روز ہونے والے روسی ڈرون حملوں کے بعد ہوا، جن میں دو یوکرینی علاقوں میں تین افراد ہلاک ہو گئے تھے۔

علاقائی گورنر اولیکساندر ہانژا نے ٹیلی گرام پر کہا کہ دنیپروپیٹروفسک کے جنوب مشرقی علاقے نیکوپول میں ایک مِنی بس پر روسی ڈرون حملے نے دو مسافروں کو ہلاک اور 12 دیگر کو زخمی کر دیا، جن میں دو بچے بھی شامل ہیں، نیکوپول، جو دریائے دنیپر کے کنارے روسی زیرِ قبضہ زاپورِژیا جوہری پلانٹ کے سامنے واقع ہے، باقاعدگی سے روسی فورسز کے نشانے پر رہتا ہے۔

گورنر اولے ہریگوروف نے کہا  کہ شمال مشرقی سومی علاقے میں، جو روس سے متصل ہے اور مسلسل حملوں کا سامنا کرتا رہتا ہے، کہ ایک ڈرون حملے میں خطے کے دارالحکومت کے قریب ایک گاؤں میں ایک شخص ہلاک ہو گیا۔

مزید جنوب میں، زاپورِژیا علاقے میں، گورنر مخائیل فیودوروف نے کہا کہ دن بھر کے روسی حملوں میں دو افراد زخمی ہوئے اور رہائشی عمارتوں کو بھی نقصان پہنچا۔

حملوں کی اس نئی لہر سے دونوں جانب سے طویل فاصلے تک مار کرنے والے حملوں کی جاری شدت واضح ہوتی ہے: روس یوکرین کے توانائی کے بنیادی ڈھانچے اور شہری علاقوں کو ہدف بنا رہا ہے، جبکہ یوکرین نے فلیمِنگو جیسے ملکی ساختہ میزائل نظام استعمال کرتے ہوئے روسی علاقے میں گہرائی تک حملہ کرنے کی بڑھتی ہوئی صلاحیت کا مظاہرہ کیا  ہے۔