جنوبی بحر الکاہل کے خطے میں واقع جزیرہ ملک کیریباتی کے قریب ایک 6 میٹر لمبی کشتی سے 5 افراد کو بچا لیا گیا ہے، جن میں دو بچے بھی شامل ہیں، جو 3 ماہ سے زائد عرصے تک سمندر میں پھنسے رہے۔
آسٹریلین براڈکاسٹنگ کارپوریشن کی رپورٹ کے مطابق، مائیکرونیشیا کے جزائر موریلو اور روؤ کے درمیان سمندری سفر پر نکلنے والا 9 افراد کا ایک گروپ جولائی کے آخر میں بحری طوفان کی زد میں آ گیا تھا۔
3 ماہ تک سمندر کی لہروں کے رحم و کرم پر رہنے والی یہ 6 میٹر طویل کشتی کیریباتی کے جزیرے فیننگ کے کھلے سمندر میں دیکھی گئی۔
کشتی میں سوار دو بچوں سمیت 5 افراد کو مقامی دیہاتیوں نے بچا لیا، جبکہ لاپتہ ہونے والے دیگر 4 افراد کی تلاش اب بھی جاری ہے۔
تخمینہ لگایا گیا ہے کہ سمندر میں لاپتہ ہونے والی اس کشتی کی 3 ماہ سے زائد عرصے سے تلاش جاری تھی اور یہ مائیکرونیشیا کے مشرق کی طرف تقریباً 5 ہزار 400 کلومیٹر دور بہہ گئی تھی۔
مغربی بحر الکاہل کے خطے میں امریکی جزیرے گوام میں قائم یو ایس کوسٹ گارڈ نے تصدیق کی ہے کہ مائیکرونیشیا کے جزیرے روؤ تک نہ پہنچنے پر اس کشتی کی گمشدگی کی اطلاع 30 جولائی کو دی گئی تھی۔
