اسرائیلی نشریاتی ادارے (کان) کے مطابق اسرائیل نے کئی ممالک سے ایران سےداغے گئے میزائلوں اور ڈرونز کو روکنے میں مدد کی درخواست کی ہے ۔
کان کی خبر کے مطابق ، "اسرائیلی حکام نے باضابطہ طور پر بین الاقوامی مدد کی درخواست کی ہے تاکہ ایران کے اسرائیل کی طرف داغے گئے ڈرونز اور بیلسٹک میزائلوں کو روکا جا سکے ، یہ درخواست فرانس اور برطانیہ دونوں سےکی گئی ہے۔"
نشریاتی ادارے نے تصدیق کی ہے کہ برطانیہ نے اس درخواست کا جواب دے دیا ہے اور مدد فراہم کر رہا ہے۔
ایک اسرائیلی عہدیدار نے کہا کہ برطانیہ نے ماضی میں اسرائیل اور ایران کے درمیان دو جھڑپوں کے دوران مداخلت کی تھی، جنہیں ایران کی "پکا وعدہ I" اور " پکا وعدہ II" آپریشن کے نام سے منسوب کیا گیا تھا۔
دریں اثنا، نشریاتی ادارے نے ایک فرانسیسی عہدیدار کا حوالہ دیتے ہوئے کہا کہ فرانس اسرائیل کی مدد کی درخواست قبول کرنے میں ہچکچاہٹ سے کام لے رہا ہے۔
یہ بھی بتایا گیا کہ ماضی میں ایک بین الاقوامی اتحاد تشکیل دیا گیا تھا تاکہ ایران کے میزائل حملوں کے خلاف اسرائیل کی مدد کی جا سکے۔
جمعہ کے روز اسرائیل نے ایران کے متعدد مقامات پر مربوط فضائی حملے کیے، جن میں فوجی اور جوہری تنصیبات شامل تھیں، جس کے جواب میں تہران نے چند گھنٹوں کے اندر جوابی حملے کیے۔
اسرائیلی حکام کے مطابق، ایرانی میزائل حملوں میں جمعہ سے اب تک کم از کم 13 افراد ہلاک اور 370 سے زیادہ زخمی ہو چکے ہیں۔
دوسری جانب ایرانی وزارت صحت نے اطلاع دی ہے کہ اسرائیل کے حملے شروع ہونے کے بعد سے اب تک 224 افراد ہلاک اور 1,277 زخمی ہو چکے ہیں۔
