بھارت کی سب سے زیادہ آبادی والی ریاست اتر پردیش میں بدھ کے روز آنے والے ایک شدید طوفان، بارش اور ژالہ باری کی وجہ سے تقریباً 90 افراد ہلاک ہو گئے۔

حکام کے مطابق، ریاست کے کئی اضلاع سے جانی نقصان کی اطلاعات ملی ہیں۔

اس شمالی ریاست میں مئی سے جون کے گرم موسم کے دوران اور مون سون کی بارشوں کے آغاز سے پہلے ایسے طوفان آنا معمول کی بات ہے۔

ٹیلی ویژن پر دکھائی جانے والے مناظر  میں دیکھا جا سکتا ہے کہ تیز ہواؤں کے جھکڑوں نے درختوں اور سائن بورڈز کو جڑ سے اکھاڑ دیا، جس کے نتیجے میں کچھ سائن بورڈز دھول اور ملبے کے بادلوں کے درمیان گاڑیوں پر جا گرے۔

ایک اہلکار نے نام ظاہر نہ کرنے کی شرط پر بتایا کہ طوفان، بجلی گرنے اور بارش سے منسلک  دیگر حادثات کی وجہ سے تقریباً 89 افراد ہلاک ہوئے ہیں۔

ریاستی ریلیف کے ایک اہلکار نے رائٹرز کو بتایا کہ کچھ اموات درخت اور مکانات کی دیواریں گرنے کی وجہ سے ہوئیں، تاہم انہوں نے امدادی کاموں کی فوری تفصیلات فراہم نہیں کیں۔

پولیس نے جمعرات کی صبح سوشل میڈیا پلیٹ فارم ایکس (X) پر لکھا کہ ، "انتظامی عہدیداروں کی ٹیمیں متاثرہ علاقوں کی مسلسل نگرانی کر رہی ہیں۔"

دوسری جانب، دارالحکومت نئی دہلی کے کچھ حصوں میں بھی بارش ہوئی، جس کی وجہ سے اندرا گاندھی انٹرنیشنل ایئرپورٹ پر پروازوں کی آمد و رفت متاثر ہوئی۔