دی کٹھمنڈو پوسٹ کے مطابق نیپال میں تباہ کن سیلابوں میں ہلاکتوں کی تعداد 469 تک ہو گئی  ہے۔

چین نے جنوب مغربی شی زانگ خود مختار خطے (جسے تبت کے نام سے بھی جانا جاتا ہے) میں تین ہلاکتوں کی تصدیق کی، جس سے مجموعی ہلاکتوں کی تعداد 472 ہو گئی۔

نیپال ٹورزم بورڈ کے مطابق جمعرات دیر گئے تک نیپال میں مجموعی طور پر 667 افراد، جن میں غیر ملکی شہری بھی شامل ہیں، لاپتہ تھے۔ بیجنگ نے کہا کہ تبت میں 550 سے زائد افراد، جن میں 260 غیر ملکی شہری شامل ہیں، لاپتہ ہیں۔

سیلاب اور لرزشِ اراضی  کے واقعات  بدھ کی صبح شمالی اور وسطی نیپال میں پیش آئے، جنہوں نے بھوٹیکوشی اور ترِشولی ندیوں کے کناروں کے علاقوں سے گزرتے ہوئے  تباہ کاریاں مچائیں۔

یہ سیلاب مکانات، پل، سڑکیں اور دیگر بنیادی ڈھانچے بہا لے گیا۔

ریسکیو ٹیمیں آپریشنز جاری رکھے ہوئے ہیں، نیپالی فوج، پولیس اور آرمڈ پولیس فورس کو تلاش، ریسکیو اور انخلا کی کوششوں کے لیے تعینات کیا گیا ہے۔

متاثرہ علاقوں تک پہنچنے اور زندہ بچ جانے والوں کو نکالنے کے لیے ہیلی کاپٹر استعمال کیے گئے، جبکہ زمینی ٹیمیں دریا  کنارے تلاش جاری رکھے ہوئے ہیں۔

ٹورزم بورڈ نے کہا کہ وہ اُن سیاحوں اور مسافروں کی موجودگی کی تصدیق جاری رکھے ہوئے ہے جو سیلاب کے وقت راسووا، نوواکوٹ اور ڈھاڈنگ میں موجود یا وہاں سے گزر رہے تھے۔

سیلابوں نے نقل و حمل کے رابطوں اور دیگر بنیادی ڈھانچے کو بھی شدید نقصان پہنچایا، جس سے متاثرہ علاقوں میں ریسکیو کوششیں مزید پیچیدہ ہو گئی ہیں۔

تباہی کی وسعت تا حال واضح نہیں ہے کیونکہ حکام مختلف علاقوں سے آنے والی ہلاکتوں اور لاپتہ افراد کی رپورٹس جمع کر رہے ہیں۔

چین نیپال سرحد کے قریب گلیشیئر کے ملبے سے بننے والی جھیلوں کے خطرے کو کم کرنے کے لیے تیزی سے اقدامات کر رہا ہے

اس دوران چین  سرحدی گزرگاہ پر مزید سیلاب کے خطرے کو کم کرنے کے لیے تیزی سے کام کر رہا ہے۔

نیپال اور چین دونوں نے جمعرات کو ہمالیہ میں مزید سیلاب کے نئے خطرات کی وارننگ دی تھی۔

ریاستی نشریاتی ادارے سی سی ٹی وی کے مطابق چینی حکام نے رکاوٹ ساز جھیل کے ہوائی سروے اور تھری ڈی ماڈلنگ کے لیے آٹھ رکنی انجینئرنگ ٹیم متحرک کر دی ہے۔

ایک انجینئر چین ہانشیاو نے کہا کہ سائٹ تک رسائی انتہائی مشکل ہے۔

چن نے سی سی ٹی وی کو کہا: 'گلیشیئر کے انہدام کے بعد جب جھیل بن گئی تو اس کے ساتھ کئی الگ تھلگ چٹانیں اور کھڑی چٹانیں ظاہر ہو گئیں۔'

چن نے کہا کہ جھیل کے خطرے کو کم کرنے کے لیے عمومی طریقہ یہ ہے کہ بند کے نچلے حصے میں ایک نکاسی چینل کھودا جائے، مگر اس چینل کی چوڑائی اور گہرائی کا حساب پانی کے بہاؤ کی رفتار اور جھیل کے بھرنے کی شرح کے مطابق ہونا چاہیے۔

ان کے سروے ڈیٹا کے مطابق جھیل تقریباً 150 میٹر لمبی اور 40-50 میٹر گہری تھی، اور اس میں 1.5 سے 2 ملین مکعب میٹر پانی کا ذخیرہ موجود  ہے۔

اِن کا اگلا کام جھیل کی نگرانی، جھیل کے کف سے ڈیٹا اکٹھا کرنا اور آئندہ چند روز میں موسمیاتی نگرانی کرنا ہے۔

گیرونگ سرحدی بندرگاہ کے علاقے میں ہلکی سے درمیانی بارش ہوئی ہے جس نے اوپر کے غیر مستحکم علاقے کے گرد مٹی اور چٹانوں کو ڈھیلا اور غیر مستحکم کر دیا ہے۔ امکان ہے کہ یہ بارش اگلے ہفتے بھی جاری رہے گی۔

چین نے جمعرات کو خبردار کیا کہ 3 ملین مکعب میٹر پانی — جو تقریباً 1,200 اولمپک سوئمنگ پولز کے برابر ہے — اگلے تین دنوں میں اب بھی بند جھیل میں بہنے کی توقع ہے، جس سے بند  ٹوٹنے کا  خطرہ پیدا ہوا ہے  اور عروجی بہاؤ 1 ستمبر کے آس پاس متوقع ہے۔

رکاوٹ ساز جھیل کی تشکیل کے عمل کو  ایک چینی ریسکیو ٹیم کی فضائی فوٹیج میں  ریکارڈ کیا گیاجسے ریاستی براڈکاسٹر سی جی ٹی این نے دکھایا۔ فوٹیج میں بھورے رنگ کا پانی ایک ایسے حوض میں جمع ہوتا دکھائی دیا جس کا کوئی واضح نکاس نظر نہیں آ رہا تھا۔