فلسطینی وزارتِ صحت نے کہا  ہے کہ مقبوضہ مغربی کنارے میں غیرقانونی اسرائیلی آباد کاروں نے دو فلسطینیوں کو گولیاں مار کر ہلاک کر دیا، جو کہ اسی عرصے کے دوران رپورٹ ہونے والی دوسری مہلک واردات ہے۔

وزارت کے بیان میں کہا گیا کہ24 سالہ  ثائر فاروق ہمایل اور 57 سالہ  فریہ جودت ہمایل رام اللہ کے شمال مشرق میں واقع شہر ابو فلاح میں غیرقانونی آباد کاروں کی فائرنگ سے ہلاک ہوئے۔

بیان میں یہ نہیں بتایا گیا کہ واقعہ کب پیش آیا اور مزید تفصیلات فراہم نہیں کی گئیں۔

اسرائیلی فوج نے تبصرے کے لیے بھیجی گئی درخواست کا فوری طور پر جواب نہیں دیا۔

مغربی کنارہ، جسے اسرائیل نے 1967 سے قابض رکھا ہوا ہے، میں تشدد اکتوبر 2023 میں غزہ پر شروع ہونے والی ظالمانہ جنگ کے آغاز کے بعد سے بڑھ گیا ہے۔

یہ جنگ بندی کے باوجود جاری رہا۔

ہفتہ کو رام اللہ کے محکمۂ صحت اور ایک مقامی میئر نے کہا کہ مقبوضہ مغربی کنارہ کے ایک اور گاؤں وادی الرخیم میں غیرقانونی اسرائیلی آباد کاروں نے ایک فلسطینی شخص کو گولی مار کر ہلاک اور اس کے بھائی کو زخمی کر دیا۔

قریبی تووانی گاؤں کونسل کے سربراہ محمد رباعی نے اے ایف پی کو بتایا کہ غیرقانونی آباد کار علاقے میں گھروں میں داخل ہوئے اور 27 سالہ عامر محمد شناران کے اہل خانہ پر حملہ کیا، جو بعد میں ہلاک ہو گئے۔

اسرائیلی فوج نے کہا کہ اسرائیلیوں اور فلسطینیوں کے درمیان "متشدد تصادم" کی اطلاعات کے بعد فوجیوں اور پولیس کو موقع پر بھیجا گیا۔

فوج  نے کہا کہ تفتیش جاری ہے۔

فلسطینی وزارتِ صحت کے مطابق، اسرائیلی فورسز اور غیرقانونی آباد کاروں نے غزہ پر اسرائیل کی نسل کش جنگ کے آغاز کے بعد سے مقبوضہ مغربی کنارہ میں کم از کم 1,042 فلسطینیوں کو ہلاک کر دیا ہے