سات ترک امریکی تنظیموں نے امریکی کانگریس کے اراکین کو بھیجے گئے ایک خط میں قانون سازوں پر زور دیا ہے کہ وہ ترکیہ کو F-35 جنگی طیاروں کی فروخت کی حمایت کریں۔

خط میں کہا گیا ہے کہ "تقریباً 75 سالہ نیٹو  اتحادی   اور  ایک سیکورٹی اور سفارتی شراکت دار کے طور پر جمہوریہ ترکیہ کی امریکی دفاعی نظام تک مسلسل رسائی بنیادی امریکی اسٹریٹجک مفادات کے عین مطابق ہے ، اس لیے ہم احترام کے ساتھ درخواست کرتے ہیں کہ آپ امریکی F-35 جنگی طیاروں کی زیر التوا فروخت کی حمایت کریں اور اس تعاون کی راہ میں حائل غیر ضروری پابندیوں اور رکاوٹوں کو دور کریں۔"

خط میں مزید کہا گیا ہے کہ اس  سودے  کی حمایت کرنا نیٹو کے اتحاد، علاقائی استحکام اور حقیقی و بڑھتی ہوئی قدر کے حامل دوطرفہ تعلقات میں ایک سرمایہ کاری ہے، ہم آپ کی حمایت کے طلبگار ہیں اور اس معاملے پر مزید بات چیت کے موقع کا خیرمقدم کرتے ہیں۔"

اس خط پر اسمبلی آف ٹرکش امریکن ایسوسی ایشنز، ٹرکش امریکن کوالیشن، فیڈریشن آف ٹرکش امریکن ایسوسی ایشنز، ٹرکش امریکن نیشنل اسٹیرنگ کمیٹی، مو سیاد  یو ایس اے، ٹرکش امریکن چیمبر آف کامرس آف دی ساؤتھ اور اسکون  یو ایس اے نے دستخط کیے۔

امریکہ نے 2019 میں ترکیہ کی جانب سے روسی S-400 فضائی دفاعی نظام کی خریداری پر اعتراض کے بعد اسے F-35 پروگرام سے معطل کر دیا تھا؛ امریکہ کا دعویٰ تھا کہ مذکورہ نظام جنگی طیاروں کو خطرے میں ڈالے گا اور یہ نیٹو سسٹمز کے ساتھ ہم آہنگ نہیں ہے۔

ترکیہ نے بارہا کہا ہے کہ دونوں نظاموں کے درمیان کوئی ٹکراؤ نہیں ہے اور اس معاملے کی جانچ کے لیے ایک کمیشن قائم کرنے کی پیشکش کی تھی۔