فلپائن میں 6.3 شدت کے زلزلے کے جھٹکے محسوس کئے گئے ہیں۔

امریکی جیولوجیکل سروے کے مطابق بدھ  کے روز فلپائن کے جنوبی ساحل کے قریب6.3 کی شدت کا زلزلہ ریکارڈ کیا گیا ہے تاہم کسی جانی یا مالی نقصان کی اطلاع موصول نہیں ہوئی۔

امریکی جیولوجیکل سروے اور پیسیفک سونامی وارننگ سینٹر کے مطابق زلزلہ مقامی وقت کے مطابق دوپہر 12:14 بجے آیا۔ اس کا مرکز سارانگانی جزیرے سے تقریباً 32 کلومیٹر جنوب مغرب میں اور گہرائی 62 کلومیٹر  تھی۔ زلزلے کے بعد سونامی کی کوئی وارننگ جاری نہیں کی گئی۔

مقامی امدادی اہلکار ہارلی ساؤرو نے کہا ہے کہ زلزلہ اس وقت آیا جب سینکڑوں افراد حکومت کی جانب سے فراہم کی جانے والی مالی امداد وصول کرنے کے لیے جمع تھے۔

انہوں نے کہا ہے کہ"زلزلے کے جھٹکے کافی شدید تھے۔ میں نے لوگوں کو گھبراہٹ میں بھاگتے  اور چیختے ہوئے دیکھا۔ زلزلہ اس وقت آیا جب مقامی انتظامیہ مالی امداد تقسیم کر رہی تھی، اس لیے عدالت کی عمارت میں بڑی تعداد میں لوگ موجود تھے لیکن خوش قسمتی سے سب محفوظ رہے۔"

ساؤرو نے مزید کہا  ہےکہ حکام کو کسی جانی نقصان یا بڑے پیمانے پر نقصان کی توقع نہیں ہے۔

یہ زلزلہ 8 جون کو آنے والے اور منڈاناؤ کے علاقے میں عمارتوں کے انہدام ، لینڈ سلائیڈنگ اور کم از کم 76 اموات کا سبب بننے والے شدید زلزلے سے دو ماہ سے بھی کم عرصے بعد آیا ہے ۔

واضح رہے کہ فلپائن بحرالکاہل کے "آتشیں چیمبر" پر واقع ہے اور دنیا کے ان علاقوں میں شمار ہوتا ہے جہاں اکثر زلزلے آتے اور آتش فشاں پھٹتے رہتے ہیں۔