متحدہ عرب امارات نے مقبوضہ مغربی کنارہ کے مختلف شہروں اور دیہات میں غیرقانونی اسرائیلی آباد کاروں کی جانب سے ہونے والے حملوں کی سخت مذمت کی ہے۔
اتوار کو جاری ایک بیان میں یو اے ای کی وزارتِ خارجہ نے ان تازہ حملوں کو، جن میں دو مساجد کو آگ لگا دی گئی، مسلمانوں کے خلاف اشتعال انگیز اقدامات اور انتہاپسندی کی کارروائی قرار دیا۔
وزارتِ خارجہ نے غیرقانونی آباد کاروں کے تواتر سے حملوں کی بھی مذمت کی اور اسرائیلی حکومت پر زور دیا کہ وہ پوری ذمہ داری قبول کرے۔ اس نے اسرائیل سے مطالبہ کیا کہ وہ اس تشدد کی اعلانیہ مذمت کرے اور ذمہ داروں کو جوابدہ ٹھہرائے۔
وزارت نے خبردار کیا کہ اگر ایسا نہ کیا گیا تو یہ بالواسطہ منظوری کے مترادف ہوگا، جو نفرت، نسل پرستی اور عدم استحکام کو ہوا دے گا۔
وزارت نے بین الاقوامی برادری سے بھی مطالبہ کیا کہ وہ اپنی ذمہ داری نبھائے تاکہ اسرائیلی خلاف ورزیوں کو روکا جا سکے اور مقبوضہ فلسطینی علاقوں اور وسیع خطے میں مزید کشیدگی کی روک تھام ممکن بنائی جائے۔
وزارت نے مشرقِ وسطیٰ کے امن عمل کو دوبارہ زندہ کرنے، ایک منصفانہ اور جامع امن کے حصول، اور دو ریاستی حل کو خطرے میں ڈالنے والی غیرقانونی کارروائیوں کے خاتمے کے لیے علاقائی اور بین الاقوامی کوششوں کی حمایت کی ضرورت پر زور دیا۔
مساجد اور شہری الگ الگ حملوں میں نشانہ بنے
اتوار کے اوائل میں، فلسطینی حکام کے مطابق، غیرقانونی اسرائیلی آباد کاروں نے مقبوضہ مغربی کنارے میں الگ الگ حملوں میں دو مساجد کو نذرِ آتش کر دیا ۔
سرکاری فلسطینی نیوز ایجنسی وفا نے اطلاع دی ہے کہ غیرقانونی آباد کاروں نے قور کے گاؤں پر دھاوا بولا اور مسجد کو آگ لگا دی، جس سے عمارت اور اس کے اندرونی حصے کو جزوی نقصان پہنچا۔
فلسطینی اور اسرائیلی ذرائع کے مطابق جمعہ کو، اسرائیلی فوج کی پشت پناہی میں غیرقانونی آباد کاروں نے نابلس کے قریب تل نامی فلسطینی قصبے پر حملہ کیا، جس کے نتیجے میں چار فلسطینی ہلاک ہو گئے۔ مقابلے کے دوران فائرنگ میں دو اسرائیلی شہری بھی ہلاک ہوئے۔
اس کے بعد اسرائیلی افواج نے نابلس اور آس پاس کے شہروں پر محاصرہ عائد کیا، بڑے پیمانے پر گرفتاریوں کی کارروائیاں کیں اور مقبوضہ مغربی کنارہ میں ایک وسیع 'فوجی کارروائی' کی تیاریوں کا اعلان کیا۔
سرکاری فلسطینی اعداد و شمار کے مطابق، اکتوبر 2023 کے بعد سے اسرائیلی افواج اور آباد کاروں نے مقبوضہ مغربی کنارہ میں کم از کم 1,182 فلسطینیوں کو ہلاک کیا، ہزاروں کو زخمی کیا اور تقریباً 24,000 افراد کو حراست میں لیا ہے۔
