اسرائیل نے لبنان کے سرحدی گاوں 'القلائیہ' کے ایک مکان پر حملے میں لبنانی مارونی کیتھولک پادری کو ہلاک کر دیا ہے۔
کیتھولک عہدیداروں اور ذرائع ابلاغ کے مطابق فادر پیئر الراہی حملے میں لگنے والے زخموں کے باعث جان بحق ہو گئے ہیں۔
الراہی نے قبل ازیں ، دیگر پادریوں کے ہمراہ،القلائیہ نامی مسیحی گاؤں کو خالی کرنے سے متعلق اسرائیلی فوجی حکم کو غیر قانونی قرار دیا اور اس کی پابندی کرنے سے انکار کر دیا تھا۔
'او ایس وی' خبر ایجنسی نے لبنانی مارونی فادر 'جین یونس' کے حوالے سے شائع کردہ خبر میں کہا ہے کہ "فادر پیئر الراہی میرے گاؤں دیبہ کے رہنے والے اور ضلع مرجاعون کے گاوں القلائیہ کی جماعت کے پادری تھے"۔
واضح رہے کہ تقریباً 8,000 نفوس والا مذکورہ مارونی گاوں اسرائیلی سرحد سے چند کلومیٹر کے فاصلے پر ہے۔
اسرائیلی فوج جنوبی لبنان، جنوبی بیروت اور وادی بقاع پر شدید بمباری کر رہی ہے۔
لبنانی ذرائع ابلاغ کے مطابق ایک اسرائیلی مرکاوا ٹینک نے،'القلائیہ' کے ایک گھر پر دو بار فائر کیا۔پہلے حملے میں گھر کامالک اور اس کی اہلیہ زخمی ہو گئے۔
جب ٹینک نے دوبارہ فائر کیا تو الراہی اور چند پڑوسی زخمیوں کی مدد کے لیے دوڑے۔ اس حملے میں پادری زخمی ہو گئے اور بعد ازاں زخموں کی تاب نہ لاتے ہوئے چل بسے۔
حملے میں دیگر کئی لبنانی شہری بھی زخمی ہوئے ہیں۔
