فیفا کے صدر جیانی انفانٹینو نے کہا ہے کہ جنگ کے باوجود ایران "یقینی طور پر" 2026 کے ورلڈ کپ میں حصہ لے گا۔
انفانٹینو نے براڈکاسٹر CNBC سے گفتگو کرتے ہوئے کہا کہ ایران یقینی طور پر آ رہا ہے۔ ہمیں امید ہے کہ اُس وقت تک صورتحال پُرامن ہو جائے گی۔
انہوں نے امریکہ میں جون میں ہونے والے ٹیم کے آئندہ میچز کے بارے میں کہاکہ ایران کو آنا ہوگا وہ اپنے عوام کی نمائندگی کرتے ہیں انہوں نے کوالیفائی کیا ہے اور کھلاڑی کھیلنا چاہتے ہیں۔
انہوں نے کہا کہ کھیلوں کو سیاست سے الگ ہونا چاہیے۔
ان کا یہ بیان اس وقت آیا جب میکسیکو نے تصدیق کی کہ فیفا نے ایران کی اس درخواست کو مسترد کر دیا ہے جس میں کہا گیا تھا کہ ان کے تمام مقابلے امریکہ کے میکسیکو منتقل کیے جائیں۔
ایران کی اس عالمی ٹورنامنٹ میں شرکت امریکہ اور اسرائیل کے ساتھ 28 فروری کو شروع ہونے والی جنگ کی وجہ سے مشکوک ہو گئی تھی۔
ایران نے مارچ 2025 میں ازبکستان کے خلاف 2-2 کے ڈرا کے بعد 2026 فیفا ورلڈ کپ کے لیے کوالیفائی کیا۔
یہ ورلڈ کپ، جس کی مشترکہ میزبانی امریکہ، میکسیکو اور کینیڈا کر رہے ہیں 11جون کو شروع ہوگا۔
تاہم، ایران کو اپنے گروپ جی کے تمام مقابلے امریکہ میں کھیلنے ہیں جن میں بیلجیئم، مصر اور نیوزی لینڈ شامل ہیں ۔
فیفا کی ویب سائٹ پر ٹیم کے شیڈول کے مطابق، ایران 15 جون کو لاس اینجلس اسٹیڈیم میں نیوزی لینڈ کے خلاف، 21 جون کو اسی مقام پر بیلجیئم کے خلاف، اور 26 جون کو سیئٹل اسٹیڈیم میں مصر کے خلاف کھیلے گا۔
