امریکہ کے پارک رینجرز نے اریزونا کے گرینڈ کینین نیشنل پارک میں آنے والے اچانک سیلاب کے بعد 20 سے زائد لاپتہ افراد کی تلاش کے لیے ہنگامی آپریشن شروع کر دیا ہے۔

نیشنل پارک سروس نے اتوار کو کہا کہ وہ عوام سے درخواست کر تے ہیں  کہ وہ 20 سے زائد ایسے افراد کے بارے میں معلومات فراہم کریں جو لاپتہ یا  ہیں یا جن کے انجام کے بارے میں علم نہیں۔

یہ سیلاب ہفتہ کی دوپہر کو برائٹ اینجل کینین اور فینٹم رینچ کے علاقوں میں آیا، جو پارک کے اندر اندرونی اور دور افتادہ حصے میں کولوراڈو دریا کے کنارے واقع ہیں۔

گرینڈ کینین نیشنل پارک کا عملہ، اریزونا ڈیپارٹمنٹ آف پبلک سیفٹی کے ساتھ ہم آہنگی سے لوگوں کو باہر نکالنے اور ممکنہ متاثرین کی تلاش کر رہے ہیں۔

اتوار تک، فینٹم رینچ اور لوئر نارتھ کائباب ٹریل سے 62 افراد کو کامیابی سے نکال لیا گیا تھا، اور حکام نے اب تک کسی بھی طرح کی زخمی ہونے کی اطلاع نہیں دی۔

انفراسٹرکچر کو نقصان

پانی کے اس طوفانی بہاؤ نے پارک کے ٹریل اور متعلقہ بنیادی ڈھانچے کو شدید نقصان پہنچایا۔

برائٹ اینجل کریک پر لگ بھگ تمام پیدل پل جو کولوراڈو دریا کی ایک بڑی معاون شاخ پر بنے تھے، تباہ ہو گئے، جس کے نتیجے میں پیدل سفر کرنے والوں کے لیے دریا  کو پار کرنا  عملاً ممکن نہیں رہا۔

کولوراڈو دریا پر بننے والے بلیک برج اور سلور برج کو بھی غیر معینہ مدت کے لیے بند کر دیا گیا ہے۔

کولوراڈو دریا  میں  دھاتی ڈھانچوں اور بھاری ملبے کے بہہ جانے کے باعث پانی کے تمام  راستوں  کو  بھی بند کر دیا گیا ہے۔

ایجنسی نے خبردار کیا ہے کہ پیر تک مزید گرج چمک اور شدید بارشیں ممکن ہیں، جو مزید ملبہ بہاؤ اور پتھروں کے گرنے کا سبب بن سکتی ہیں۔