امریکی روزنامہ نیو یارک ٹائمز نے رپورٹ کیا ہے کہ موجودہ اور سابق امریکی عہدیداروں کا ماننا تھا کہ حساس جنگ بندی مذاکرات کے دوران اسرائیل ایران کے اعلیٰ مذاکرات کاروں کو قتل کرنے کی سازش  میں ملوث ہو گا۔

اخبار نے امریکی عہدیداروں کے حوالے سے جمعرات کو کہا کہ واشنگٹن اس بات پر فکرمند تھا کہ جب اپریل میں پاکستان کی ثالثی میں مذاکرات میں تیزی آئی تھی تو  ایران کے وزیر خارجہ عباس عراقچی اور پارلیمنٹ کے اسپیکر محمد باقر قالیباف ممکنہ طور پر ہدف بن سکتے تھے۔

رپورٹ کے مطابق ٹرمپ انتظامیہ اس قدر پریشان تھی کہ اس نے علاقے کے دوسرے ممالک سے کہا کہ وہ تہران کو خبردار کریں کہ اسرائیل ان دو عہدیداروں پر حملہ کر سکتا ہے۔

امریکی عہدیداروں کے بقول، اپریل میں مذاکرات کے سنجیدگی سے شروع ہونے کے بعد کوئی بھی اقدامِ قتل مذاکرات کو ختم کر دیتا اور امریکہ-اسرائیل بمقابلہ ایران جنگ کو دوبارہ بھڑکا دیتا۔

رپورٹ میں کہا گیا  ہے کہ واشنگٹن کو معلوم ہوا تھا  کہ کم از کم قالیباف کو اسرائیلی ہدف فہرست میں شامل کر لیا گیا تھا اور واشنگٹن نے اسرائیل سے کہا کہ وہ آگے نہ بڑھے۔

اس میں ایرانی عہدیداروں کا حوالہ بھی دیا گیا کہ تہران نے پاکستانی اور قطری ثالثوں کے ذریعے امریکہ سے یہ ضمانتیں طلب کیں کہ سفارتی ملاقاتوں کے دوران اسرائیل اس کی مذاکراتی ٹیم پر حملہ نہیں کرے گا۔

رپورٹ میں اپریل کے ایک واقعے کی تفصیل بھی دی گئی جس میں قالیباف کی اسلام آباد سے واپسی پرواز ،ایرانی سکیورٹی فورسز کے دو اسرائیلی طیاروں کو ایرانی فضائی حدود میں داخل ہوتے ہوئے  دیکھنے کے  بعد مشہد کی طرف موڑ دی گئی تھی۔

علی خامنہ ای کا جنازہ

ایک امریکی عہدیدار نے اخبار کو بتایا کہ امریکی اور ایرانی وفود کے درمیان بات چیت جاری ہے اور صدر ڈونلڈ ٹرمپ چاہتے ہیں کہ امن عمل "اپنی رفتار سے آگے بڑھے۔"

ٹرمپ نے دہرایا کہ امریکہ ایران میں حکومت تبدیل کرنے کی خواہش نہیں رکھتا، اور کہا کہ واشنگٹن کا مقصد تہران کو جوہری ہتھیار حاصل کرنے سے روکنا ہے۔

انہوں نے CNBC کے ساتھ ایک انٹرویو میں کہا کہ "ہم حکومت کی تبدیلی نہیں چاہتے۔ میں کچھ بہت سادہ چاہتا ہوں: وہ جوہری ہتھیار نہیں رکھ سکتے،"

ٹرمپ نے ایران کے خلاف حالیہ امریکی فوجی کارروائی کا دفاع  کرتے ہوئے کہا کہ  ملک 'مکمل طور پر فوجی طور پر شکست خوردہ' ہو چکا ہے۔

انہوں نے کہا کہ "میں نے انہیں فوجی طور پر شکست دی ہے۔  ان کے پاس کچھ میزائل بچے ہیں، ہم انہیں بھی ختم کر سکتے ہیں، اور گزشتہ  ہفتے تین بار ان پر حملہ کیا، کیونکہ انہوں نے ایک ڈرون کو ایک جہاز کی طرف بھیجا تھا۔

ادھر، قطری اور پاکستانی ثالثوں نے جمعرات کو کہا کہ امریکہ اور ایران کے درمیان اگلا دور 'جیسے ہی ممکن ہو' منعقد کیا جائے گا، ایران کے سابق سپریم لیڈر علی خامنہ ای کے جنازے کی رسومات کے بعد، جنہیں 28 فروری کو امریکی-اسرائیلی حملوں میں قتل کیا گیا تھا، اور جنازہ کی تقریبات 4 جولائی سے 9 جولائی تک شیڈول ہیں۔