ڈنمارک کے وزیر اعظم میٹے فریڈرکسن نے کہا ہے کہ "سوشل میڈیا پلیٹ فارم ہمارے بچوں کا بچپن چُرا رہے ہیں۔ ہم  بچوں کے سوشل میڈیا استعمال پر پابندی لگائیں گے"۔

منگل کے روز پارلیمنٹ کے افتتاحی اجلاس  سےخطاب میں فریڈرکسن نے خبردار کیا ہے کہ معاشرہ "ایک عفریت کو آزاد کر چکا ہے" اور اس عفریت کی وجہ سے  نوجوانوں میں بے چینی، ڈپریشن اور توجہ کے مسائل میں اضافہ ہو رہا ہے۔

انہوں نے کہا ہے کہ "اس سے پہلے کبھی اتنے زیادہ بچے اور نوجوان بے چینی اور ڈپریشن کا شکار نہیں ہوئے تھے جتنے اب ہو رہے ہیں"۔

فریڈرکسن نے مزید کہا  ہےکہ ٹیلی فون اور کمپیوٹر اسکرینیں بچوں کو ایسے مواد کے سامنے لاتی ہیں "جو کسی بچے یا نوجوان کو نہیں دیکھنا چاہیے"اور ان کی پڑھنے اور توجہ مرکوز کرنے کی صلاحیت کو متاثر کرتی ہیں۔

مجوزہ قانون کے تحت کئی بڑے پلیٹ فارموں تک رسائی کو روکا جائے گا تاہم والدین 13 سال کی عمر سے بچوں کو سوشل میڈیا دیکھنے کی  اجازت دے سکیں گے۔ حکومت امید کرتی ہے کہ یہ پابندی اگلے سال تک نافذ ہو جائے گی۔

ڈیجیٹلائزیشن کی وزیر کیرولین سٹیج نے اس منصوبے کو"ایک بڑی پیش رفت" قرار دیا  اور اعتراف کیا ہے کہ ڈنمارک نے بچوں کو ٹیکنالوجی کمپنیوں کے حوالے کرکے  "ضرورت سے زیادہ سادگی"کا مظاہرہ کیا ہے۔

انہوں نے کہا  ہے کہ "ہمیں ڈیجیٹل  کی اسیری سے رہائی پا کر  معاشرہ بننے کی طرف بڑھنا ہوگا"۔

فریڈرکسن نے اعداد و شمار کا حوالہ دیتے ہوئے کہا ہےکہ اب 11 سے 19 سال کی عمر کے 60 فیصد ڈینش لڑکے شاذ و نادر ہی اپنے دوستوں سے بالمشافہ ملاقات کرتے ہیں اور ساتویں جماعت کے 94 فیصد طلباء کے ذاتی سوشل میڈیا پروفائل ہیں۔

مزید ممالک احتیاطی اقدامات اختیار کر رہے ہیں

ڈنمارک کا یہ اقدام دنیا بھر میں بچوں کو ٹک ٹاک، یوٹیوب، فیس بک، انسٹاگرام اور اسنیپ چیٹ  کے مضمر اثرات سے بچانے کے لئے اٹھائے گئے ایسے ہی اقدامات کے بعد سامنے آیا ہے۔

گزشتہ ماہ ایک فرانسیسی پارلیمانی کمیٹی نے ٹک ٹاک کے نقصان دہ اثرات کا حوالہ دے کر 15 سال سے کم عمر بچوں کے لیے سوشل میڈیا پر پابندی اور نوجوانوں کے لیے ڈیجیٹل کرفیو کی سفارش کی تھی۔

آسٹریلیا نے  دنیا میں پہلی بار ایک بل متعارف کرایا ہے جو 16 سال سے کم عمر بچوں کو سوشل میڈیا  کو ممنوع کر دے گا۔ ٹک ٹاک، فیس بک، اسنیپ چیٹ، ریڈٹ، ایکس اور انسٹاگرام جیسے پلیٹ فارموں کو نابالغ اکاؤنٹوں کو بلاک کرنے میں ناکامی پر 33 ملین ڈالر تک جرمانے کا سامنا کرنا پڑ سکتا ہے۔

جنوبی کوریا نے مارچ 2026 سے اسکول کے اوقات کے دوران ٹیلی فون اور اسمارٹ ڈیوائسوں  کے استعمال پر پابندی کے لیے قانون سازی کی ہے۔

بہت سے ممالک نے اسی طرح کی پابندیاں نافذ کی ہیں، جن میں فن لینڈ، اٹلی، نیدرلینڈز اور چین بھی شامل ہیں۔

ترکیہ بھی مرحلہ وار شکل میں عمر کی حدیں متعین کرانے کا منصوبہ بنا رہا ہے اور صدر رجب طیب اردوعان نے خبردار کیا ہے کہ اسکرین کی لت"ایک وبا کی طرح پھیل رہی ہے"۔

دریں اثنا، بچوں کی حفاظت میں ناکامی پر تنقید کے بعد، روبلوکس جیسے پلیٹ فارم بھی عمر کی تصدیق اور والدین کے کنٹرول کو سخت کر رہے ہیں۔