امریکہ کے یومِ آزادی کی تعطیل کی رات نیویارک سٹی کے علاقے کونی آئی لینڈ میں فائرنگ کے ایک واقعے میں چار بچوں سمیت  کم از کم آٹھ افراد زخمی ہو گئے ہیں۔

نیو یارک پولیس ڈیپارٹمنٹ (NYPD) کی 'اے بی سی نیوز' کو فراہم کردہ معلومات کے مطابق پولیس اہلکاروں نے بروکلین کے علاقے ویسٹ 31ویں اسٹریٹ پر ہفتہ کی رات تقریباً 10 بج کر 37 منٹ پر فائرنگ کی اطلاع ملنے کے بعد موقع پر پہنچ کر کارروائی کی۔

رپورٹ کے مطابق زخمی ہونے والوں میں دو مرد، دو عورتیں اور چار بچے شامل ہیں، جن کی عمریں بالترتیب 14، 12، 7 اور 6 سال ہیں۔

این وائی پی ڈی کے مطابق تمام زخمیوں کو اسپتال منتقل کر دیا گیا ہے۔ زخمیوں میں سے ایک 21 سالہ عورت کی حالت نازک اور باقی سات کی حالت تسلی بخش ہے ۔

اے بی سی نیوز کے مطابق پولیس نے جائے وقوعہ سے ایک آتشیں اسلحہ برآمد کر لیا ہے، تاہم اب تک کسی شخص کو گرفتار نہیں کیا گیا۔

رائٹرز کی جانب سے تبصرے کی درخواست پر این وائی پی ڈی نے فوری طور پر کوئی ردِعمل نہیں دیا۔

واضح رہے کہ ہفتہ کے روز امریکہ نے اپنی آزادی کی 250ویں سالگرہ منائی تھی۔