یورپ میں انڈیکس فیوچر معاہدوں نے بڑھتے ہوئے جنگی خدشات کے درمیان نئے دن کا آغاز منفی انداز میں کیا۔ برطانیہ میں ایف ٹی ایس ای 100 فیوچر انڈیکس میں 0.3 فیصد، فرانس میں سی اے سی 40 فیوچر انڈیکس اور جرمنی میں ڈی اے ایکس 40 فیوچرز میں تقریبا 1.6 فیصد اور اٹلی میں ایف ٹی ایس ای ایم آئی بی 30 فیوچرز میں 0.7 فیصد کمی ہوئی۔
ایشیا میں جاپان میں نکی 225 انڈیکس 1.2 فیصد، جنوبی کوریا میں کوسپی انڈیکس 1.3 فیصد، چین میں شنگھائی کمپوزٹ انڈیکس 0.7 فیصد اور ہانگ کانگ میں ہینگ سینگ انڈیکس 0.8 فیصد گر گیا۔
ایرانی میڈیا رپورٹس کے مطابق اسرائیلی حملوں کا آغاز مقامی وقت کے مطابق صبح تین بجے ہوا اور اس میں فوجی اور جوہری تنصیبات کے ساتھ ساتھ رہائشی علاقوں کو بھی نشانہ بنایا گیا۔
اسرائیلی فوج کا کہنا ہے کہ جمعے کی علی الصبح 200 اسرائیلی طیاروں نے ایران کو نشانہ بنایا۔
فوج کے ترجمان بریگیڈیئر جنرل ایفی ڈیفرن نے کہا کہ 200 اسرائیلی طیاروں نے حملوں کے دوران 330 گولہ بارود گرائے۔
انہوں نے مزید کہا کہ اس کے جواب میں ایران نے حالیہ گھنٹوں میں اسرائیل کی جانب 100 سے زائد ڈرون داغے ہیں اور انہیں روکنے کی کوششیں جاری ہیں۔
انہوں نے حملوں میں متعدد سینئر ایرانی عہدیداروں کی ہلاکت کی بھی تصدیق کی جن میں چیف آف اسٹاف محمد باقری، ایرانی پاسداران انقلاب کے سربراہ حسین سلامی اور محاپاسداران کے سینئر کمانڈر غلام علی راشد شامل ہیں۔
دونوں ممالک ممکنہ فوجی محاذ آرائی کی تیاری کر رہے ہیں اور ایران مبینہ طور پر اسرائیلی علاقے کو نشانہ بنانے والے بیلسٹک میزائلوں سے نمٹنے کے منصوبے تیار کر رہا ہے۔
