ترک صدر رجب طیب ایردوان نے امریکی صدر ڈونلڈ ٹرمپ سے نیدرلینڈز کے بادشاہ ولیم الیگزینڈر اور ان کی اہلیہ کی جانب سے نیٹو سربراہی اجلاس میں شرکت کرنے والے رہنماؤں اور ان کی   بیگمات کے اعزاز میں دیے گئے عشائیہ کے دوران ملاقات کی۔

انادولو ایجنسی کے مطابق، ایردوان اور ٹرمپ نے دی ہیگ میں  ملاقات کے دوران علاقائی، عالمی امور کے ساتھ ساتھ دوطرفہ تعلقات پر بھی تبادلہ خیال کیا۔

ترک صدر نے امریکی صدر ڈونلڈ ٹرمپ کی کوششوں سے حاصل ہونے والی اسرائیل اور ایران کی جنگ بندی کا خیر مقدم کرتے ہوئے دیرپا امن، غزہ کی نسل کشی کے خاتمے اور روس یوکرین جنگ پر بات چیت پر زور دیا۔

ترک صدر رجب طیب اردوان نے امریکہ کے ساتھ توانائی، سرمایہ کاری اور دفاع کے شعبوں میں تعاون کے وسیع امکانات پر روشنی ڈالتے ہوئے کہا کہ تعلقات کو آگے بڑھانے سے 100 ارب ڈالر کے تجارتی ہدف کو حاصل کرنے میں مدد مل سکتی ہے۔

بیان میں کہا گیا ہے کہ دونوں رہنماؤں نے اتحاد میں اہم اتحادیوں کی حیثیت سے نیٹو کی موجودگی مضبوط بنانے کی اہمیت پر زور دیا۔

ٹی آر ٹی ورلڈ کے حسن عبداللہ نے دی ہیگ سے رپورٹنگ کرتے ہوئے بتایا کہ صدر ایردوان نے جہاں ایران اسرائیل جنگ بندی کے لیے ثالثی کرنے پر ٹرمپ کا شکریہ ادا کیا وہیں انہوں نے محصور غزہ میں جاری بحران پر بھی تشویش کا اظہار کیا۔

اس سے قبل منگل کے روز ترک صدر رجب طیب ایردوان ہالینڈ پہنچے تھے جہاں وہ نیٹو کے دو روزہ سربراہی اجلاس میں شرکت کر رہےہیں۔

ترک صدر ایمسٹرڈیم کے شیفول ہوائی اڈے پر اترے جہاں ڈچ حکام، نیٹو میں ترک سفیر بساط اوزترک اور ہیگ میں ترک سفیر سلجوک اُنال نے ان کا استقبال کیا بعد میں وہ دی ہیگ روانہ ہو گئے۔

صدر کے ہمراہ  خاتون اول امینہ  ایردوان، وزیر خارجہ خاقان فدان، قومی وزیر دفاع یشار گولر، ترک خفیہ ایجنسی  کے سربراہ ابراہیم کالن، صدارتی شعبہ اطلاعات کے صدر فخرالدین التون اور ایردوان کے خارجہ پالیسی اور سلامتی کے اعلیٰ مشیر عاکف  چغتائی کلیچ بھی موجود ہیں۔

شاہی محل میں منعقدہ عشائیہ میں امینہ  ایردوان ترک صدر کے ہمراہ تھیں۔

توقع ہے کہ ترک صدر سربراہی اجلاس کے دوران متعدد عالمی رہنماؤں کے ساتھ دو طرفہ ملاقاتیں کریں گے، جس میں یورو اٹلانٹک خطے کو درپیش اسٹریٹجک خطرات  پر توجہ مرکوز کی جائے گی۔

نیٹو کا دو روزہ سربراہ اجلاس بدھ کو اختتام پذیر ہوگا۔