جنوبی کوریا کی فوج نے پیر کے روز دعویٰ کیا  ہے کہ شمالی کوریا نے ممکنہ طور پر روس سے "تکنیکی مدد" حاصل کی ہے تاکہ فضا سے فضا میں مار کرنے والا ایک نیا  میزائل تیار کیا جا سکے ۔

شمالی کوریا کے رہنما کم جونگ اُن نے گزشتہ ہفتے ایک فضائیہ کے فلائٹ گروپ کی جانب سے اینٹی ایئرکرافٹ جنگی مشقوں اور فضائی حملے کی مشقوں کی نگرانی کی تھی۔ پیانگ یانگ کے سرکاری میڈیا کے مطابق، اس دوران فضا سے فضا میں مار کرنے والے  میزائل کی  MiG-29  لڑاکا طیارے سے لانچ کرتے ہوئے ایک لائیو فائر ڈرل دکھائی گئی۔

سیول  کی یونہاپ نیوز ایجنسی  کے مطابق، جوائنٹ چیف آف اسٹاف کے ترجمان کرنل لی سنگ جن نے کہا، "ہم سمجھتے ہیں کہ اس میں ایک تعلق موجود ہے۔"

یہ بیان اس سوال کے جواب میں دیا گیا تھا کہ آیا شمالی کوریا نے روس سے فوجیوں کی تعیناتی کے بدلے ہتھیار اور جدید ٹیکنالوجی حاصل کی ہے۔

تاہم، لی نے مزید کہا کہ روس کی ممکنہ تکنیکی مدد کی سطح  اور دائرہ کار کا تعین کرنے کے لیے مزید تحقیق کی ضرورت ہے۔

"ایسے کئی معاملات سامنے آئے ہیں جن میں شمالی کوریا نے دھوکہ دینے یا مبالغہ آرائی کرنے کی کوشش کی... پرزوں اور مواد کی دستیابی میں مسائل کی وجہ سے تعیناتی میں تاخیر ہوئی۔"

انہوں نے کہا، "ہم سمجھتے ہیں کہ ان ہتھیاروں کے نظام کے آپریشنل ہونے میں بھی کافی وقت لگے گا۔"

یونہاپ نیوز کے مطابق پیانگ یانگ کا ارادہ ہے کہ وہ  اپنا فضا سے فضا میں  مار کرنے والا میزائل نظام تیار کرے، اور دفاعی حکام امید رکھتے ہیں کہ 2032 تک اس  میزائل نظام پر تحقیق کا منصوبہ مکمل کر لیا جائے گا اور 2035 تک اسے فعال بنا دیا جائے۔