حزب اللہ گروپ نے کہا ہے کہ اس نے لبنان پر حالیہ حملوں کے جواب میں شمالی اسرائیل کی طرف راکٹ فائر کیے ہیں۔

ایک بیان میں، گروپ نے جمعرات کی صبح کہا کہ اس نے اسرائیل کی جانب سے جنگ بندی معاہدے کی خلاف ورزی کے جواب میں اسرائیلی بستی منارا کو راکٹوں سے نشانہ بنایا۔​​​​​​​

حزب اللہ نے کہا کہ اس کا ردعمل اس وقت تک جاری رہے گا "جب تک ہمارے ملک اور ہمارے لوگوں کے خلاف امریکہ اوراسرائیل کی جارحیت بند نہیں ہو جاتی۔

اس سے قبل، یدیعوت آحارونوت نے بتایا کہ لبنان سے شمالی اسرائیل کی طرف داغے جانے کے بعد میزائل کو بالائی جلیل کے اوپر روک لیا گیا۔

اخبار نے مزید کہا کہ راکٹ داغے جانے کے بعد جلیل پین ہینڈل میں فضائی حملے کے سائرن بج اٹھے۔

یہ پیش رفت ایک دن بعد سامنے آئی جب امریکہ اور ایران نے جنگ بندی کے ایک معاہدے کا اعلان کیا جس کا مقصد 28 فروری کو واشنگٹن اور تل ابیب کی جانب سے تہران کے خلاف شروع کی گئی جنگ کو ختم کرنے کے لیے حتمی معاہدے کی راہ ہموار کرنا ہے۔

 اسرائیل نے کہا کہ وہ ایران کے ساتھ دو ہفتے کی جنگ بندی کی حمایت کرتا ہے، لیکن ایرانی اور پاکستانی حکام کے بیانات کے برعکس اس نے اصرار کیا کہ اس میں لبنان شامل نہیں ہے ۔

اسرائیلی فوج نے بدھ کے روز لبنان بھر میں فضائی حملوں کی ایک بڑی لہر شروع کی، جس میں کم از کم 254 افراد ہلاک اور 1,165 دیگر زخمی ہوئے ۔

2 مارچ سےاسرائیل نے لبنان پر اپنے حملوں میں 1,530 سے زائد افراد کو ہلاک کیا ہے۔