روس اور یوکرین نے ایک دوسرے پر جمعہ کی شب حملے کرنے کا الزام عائد کیا جن میں دو افراد ہلاک اور نو دیگر زخمی ہوئے۔

وولگوگراد کے گورنر اینڈرے بوچاروف نے کہا کہ جنوبی وولگوگراد میں ایک یوکرینی ڈرون حملے نے ایندھن اور توانائی کے ایک مرکز اور شہر کے دزیرجنسکی ضلع میں گوداموں میں آگ لگا دی، جس سے شہری بنیادی ڈھانچے کو نقصان پہنچا اور پانچ افراد زخمی ہو گئے۔

بوچاروف نے روس کے سوشل میڈیا پلیٹ فارم میکس پر لکھا ہے کہ "ہنگامی امدادی ٹیمیں اس وقت جائے وقوعہ پر موجود ہیں، اور آگ بجھانے کی کوششیں جاری ہیں۔"

روس کے آن لائن ریٹیلر وائلڈ بیریز نے حملے کی تصدیق کی اور کہا کہ وولگوگراد میں اس کے ایک لاجسٹکس سینٹر میں آگ لگی ہوئی ہے۔

کمپنی نے ٹیلی گرام پر کہا کہ"ابتدائی اطلاعات میں جانی نقصان کی رپورٹیں موجود نہیں ہیں," اور بتایا کہ لاجسٹکس آپریشنز کو دیگر تنصیبات  کی طرف منتقل کر دیا گیا ہے۔

روسی وزارت دفاع نے دعویٰ کیا کہ اس نے پورے ملک، الحاق شدہ کریمیا اور بحرِ اسود و بحرِ ازوف کے پانیوں میں جمعہ کی شب 371 یوکرینی ڈرونز کو روکا اور تباہ کیا۔

یوکرین میں، دنیپروپیترووسک علاقائی فوجی انتظامیہ کے سربراہ اولیکساندر ہانژا کے مطابق نیکوپول ضلع میں ایک روسی حملے میں دو افراد ہلاک اور تین زخمی ہوگئے۔

یوکرین فضائیہ نے دعویٰ کیا  ہے کہ اس نے شمالی، جنوبی اور مشرقی یوکرین کے اوپر 195 روسی ڈراون مار گرائے ہیں۔