صدر رجب طیب ایردوان  کا کہنا ہے کہ ، "ہمارے خطے میں تاریخ دوبارہ  رقم کی جا رہی  ہے۔ ترکیہ اپنی پرامن پالیسیوں کے ذریعے خطے کی رہنمائی کر رہا ہے۔"

صدر ایردوان نے ملازگرِت قومی پارک میں منعقدہ 'اناطولیہ کی فتح - ملازگرِت 1071' کے 955 ویں سالانہ یادگاری پروگرام سے خطاب کیا۔

اپنے خطاب میں ایردوان نے کہا، "ضرورت پڑنے پر ہم ہر چیز سے چشم پوشی کر سکتے ہیں، لیکن جب بات ہمارے وطن کی ہو، ہماری ریاست اور قوم کے مستقبل کا سوال ہو تو ہم کسی کے آگے سر  خم نہیں کرتے۔"

انہوں نے کہا کہ "اس خطے میں ہمارے پاس مضبوط، متحد اور اتحاد قائم کرنے کے سوا کوئی چارہ نہیں۔"

" جب بھی ہم نے ایک  قوم ہونے کا مظاہرہ کیا، اتحاد کو ترجیح دی،  کندھے سے کندھا ملا کر کام کیا، ایک دوسرے سے  مضبوطی سے جڑے رہے تو   ہمیں کامیابیاں اور فتوحات نصیب ہوئیں۔ 955 سال پرانی  داستانِ ملازگرِت  کو فراموش نہ کریں ، یہ فتح بھی انہی خصوصیات کی مرہون ِ منت ہے۔"

اپنے خطاب میں انہوں نے ' دہشت گردی  سے پاک  ترکیہ' عمل کی طرف بھی اشارہ کرتے ہوئے کہا ، "ہم نے یہ قدم  بھائی چارے کے لیے اٹھایا ہے،  دوست و دشمن سب جان لیں کہ ہمارے خطے میں تاریخ دوبارہ  سے رقم کی جا رہی ہے۔ ترکیہ اپنی پُرامن پالیسیوں  کی بدولت  خطے کی رہنمائی کر رہا ہے۔ اب کوئی اس کا راستہ  نہیں روک سکتا۔"

صدر نے کہا، "جو لوگ بھڑکانے اور چالیں چلنے کے ذریعے ترکیہ اور ترک قوم کی اس خوش آئند  پیشرفت کو روکنے کا خیال رکھتے ہیں، وہ مایوسی سے دو چار ہوں  گے۔"