ایران کے وزیر خارجہ گزشتہ ماہ بھارتی زیر انتظام کشمیر میں سیاحوں پر ہونے والے  جان لیوا حملے کے بعد اسلام آباد اور نئی دہلی کے درمیان کشیدگی میں ثالثی کی کوشش کرنے کے لیے آج  پاکستان آئے  ہیں۔

پاکستان کی وزارت خارجہ نے کہا ہے کہ متنازعہ کشمیر کے علاقے میں سیاحوں پر  حملے کے بعد کشیدگی بڑھنے کے بعد عباس اراغچی کا یہ پہلا دورہ ہے۔

یہ دورہ تہران کی جانب سے دونوں ممالک کے درمیان کشیدگی کو کم کرنے میں مدد کی پیش کش کے چند روز بعد ہو رہا ہے۔

اراغچی کو اسلام آباد کے قریب ہوائی اڈے پر اترنے کے بعد سینئر پاکستانی حکام نے خوش آمدید کہا۔ وہ اپنے پاکستانی ہم منصب اسحاق ڈار، صدر آصف علی زرداری اور وزیر اعظم شہباز شریف سے بھی ملاقات کریں گے۔

پاکستان کی مسلح افواج گزشتہ ہفتے سے ہائی الرٹ ہیں، جب کابینہ کے وزیر عطاء اللہ تارڑ نے کہا تھا کہ اسلام آباد کے پاس قابل اعتماد انٹیلی جنس ہے کہ بھارت 22 اپریل کو پہلگام میں ہونے والے حملے کے جواب میں پاکستان پر حملہ کر سکتا ہے، جس میں بھارت کے زیر انتظام کشمیر میں 26 سیاح ہلاک ہوئے تھے جن میں زیادہ تر ہندو تھے۔

پاکستان نے اس حملے میں کسی بھی کردار سے انکار کیا ہے اور قابل اعتماد بین الاقوامی تحقیقات کی پیش کش کی ہے۔

نئی دہلی نے اب تک اس پیشکش کو قبول نہیں کیا ہے اور امریکہ کے عہدیداروں سمیت متعدد عالمی رہنماؤں نے دونوں فریقوں پر زور دیا ہے کہ وہ تحمل کا مظاہرہ کریں اور مزید کشیدگی سے گریز کریں۔

کشمیر بھارت اور پاکستان کے درمیان تقسیم ہے اور اس پر دونوں کا مکمل دعویٰ ہے۔ دونوں ممالک نے ہمالیائی خطے پر اپنی تین میں سے دو جنگیں لڑی ہیں اور ان کے تعلقات تنازعات، جارحانہ سفارت کاری اور باہمی شکوک و شبہات کی بنیاد پر تشکیل پائے ہیں، جس کی بڑی وجہ کشمیر پر ان کے مسابقتی دعوے ہیں۔

تازہ ترین کشیدگی کے نتیجے میں دونوں ممالک نے ایک دوسرے کے سفارت کاروں اور شہریوں کو ملک بدر کرنے کے ساتھ ساتھ فضائی حدود کو بھی بند کردیا ہے ۔