نیپال کے دارالحکومت کٹھمنڈو جانے والی ایک مسافر بس ضلع دھاڈنگ میں تِشولی دریا میں جاگرنے سے کم از کم 17 افراد ہلاک اور 24 زخمی ہوگئے۔

نیپال پولیس فورس کے مطابق یہ حادثہ اتوار کی شام کو پیش آیا۔

فورس کے ترجمان بشنو پرساد بھٹّا نے کہا کہ تمام سکیورٹی فورسز کے کئی اہلکار زمینی سطح پر ریسکیو کا کام جاری رکھے ہوئے ہیں۔

ریسکیو ورکرز ہلاک شدگان کی شناخت کرنے کی کوشش کر رہے ہیں، جبکہ زخمی مسافروں کو قریبی ہسپتالوں میں منتقل کیا جا رہا ہے۔

حادثے کی وجہ فوری طور پر واضح نہیں ہوئی۔

نیپال ایک پہاڑی ملک ہے جہاں خراب انفراسٹرکچر، پرانی گاڑیاں اور خطرناک راستوں کی وجہ سے حادثات کافی  عام ہیں۔