اسرائیل نے بغیر کسی پیشگی وارننگ کے غزہ کے وسط میں واقع ایک رہائشی عمارت کو نشانہ بنا کر کئے گئے  حملے میں سات فلسطینیوں کو زخمی کر دیا ہے۔

طبی  ذرائع کے مطابق درمیانے اور شدید درجے کے زخمیوں کو شہر کے مختلف اسپتالوں میں منتقل کر دیا گیا ہے۔

عینی شاہدین کے مطابق جمعہ کے دن علی الصبح  اسرائیلی ہیلی کاپٹر نے غزہ کے مرکز میں واقع یرموک اسٹیڈیم کے قریب حراز عمارت کے نیچے موجود تجارتی گوداموں پر حملہ کیا، جس کے نتیجے میں متعدد افراد زخمی ہوگئے ہیں۔

ایک اور بیان میں غزہ کی 'شہری تحفظ انتظامیہ'  نے کہا  ہےکہ اس کی ٹیموں نے حملے کے بعد علاقے میں لگنے والی آگ پر قابو پا لیا اور کئی زخمیوں کو وہاں سے نکال لیا۔

جاری جنگ بندی کی خلاف ورزیاں

ایک اور واقعے میں مقامی ذرائع نے کہا ہے کہ اسرائیلی بحریہ نے مشین گنوں سے فائرنگ کی اور غزہ میں ماہی گیروں کی کشتیوں اور ساحلی پٹّی کو توپ خانے سے نشانہ بنایا۔

اسرائیلی توپ خانے نے فوجی گاڑیوں کی فائرنگ کی مدد سے غزہ کے مشرقی علاقے التفاح کے مشرقی حصوں پر بھی گولہ باری کی، تاہم اب تک کسی جانی نقصان کی اطلاع نہیں ملی۔

غزہ  وزارتِ صحت کے مطابق اسرائیل،  10 اکتوبر 2025 کو نافذ ہونے والے جنگ بندی معاہدے کی خلاف ورزیوں کے دوران 922 فلسطینیوں کو قتل اور  2,786 کو زخمی کر چُکا ہے۔

فلسطینی حکام کے مطابق اسرائیل،  8 اکتوبر 2023 سے غزہ پر مسلّط کردہ "نسل کشی جنگ" میں 72 ہزار سے زائد فلسطینیوں کو قتل اور ایک لاکھ  72  ہزار سے زیادہ کو زخمی کر چکا ہے۔