ملائیشین حکام نے اعلان کیا ہے کہ جزیرہ بورنیو  کے شمال مغربی ساحل پر واقع ریاست سراواک  کے ایک دور دراز اندرونی ہوائی اڈے کے قریب ہیلی کاپٹر گرنے کے نتیجے میں پانچ افراد اپنی جان سے ہاتھ دھو بیٹھے ہیں۔

جاری کردہ بیان کے مطابق، ملک کی 'فلائنگ ڈاکٹر سروس' کے زیرِ انتظام چلنے والا BO-105 ماڈل کا ہیلی کاپٹر منگل کی دوپہر کو مِیری  شہر سے تقریباً 315 کلومیٹر جنوب مشرق میں گر کر تباہ ہوا۔

میری ڈیساسٹر مینجمنٹ کے سربراہ گالونگ لوانگ نے اپنے بیان میں بتایا: "فائر اینڈ ریسکیو ڈیپارٹمنٹ اور وزارتِ صحت کی رپورٹس کے مطابق اس بات کی تصدیق ہو چکی ہے کہ ہیلی کاپٹر میں سوار تمام افراد ہلاک ہو گئے ہیں۔"

مقامی میڈیا کے مطابق، ہلاک ہونے والوں میں پائلٹ، ایک ڈاکٹر، ایک میڈیکل اسسٹنٹ اور دو نرسیں شامل ہیں۔

 سوشل میڈیا پر وائرل ہونے والی حادثے کی ویڈیوز سے معلوم ہوتا ہے کہ ہیلی کاپٹر گرنے سے کچھ دیر پہلے اس سے شدید دھواں نکل رہا تھا۔

ملائیشیا کی سول ایوی ایشن اتھارٹی نے بتایا کہ ملائیشین ایئر کریش انویسٹی گیشن ٹیم کے بدھ کے روز جائے حادثہ پر پہنچنے کی امید ہے۔

فی الحال یہ واضح نہیں ہو سکا کہ حادثہ کس وجہ سے پیش آیا۔

ملائیشیا کی فلائنگ ڈاکٹر سروس ملک کے اندرونی حصوں میں گھنے جنگلات اور دشوار گزار پہاڑی راستوں کے باعث فضائی سفر پر انحصار کرنے والے مقامی قبائل اور کمیونٹیز کو طبی امداد فراہم کرتی ہے۔