امریکہ کے  صدر ڈونلڈ ٹرمپ نے کہا ہے کہ "اسرائیلی حملوں کے بعد قطر کو سیاسی اعتبار سے زیادہ محتاظ ہونا چاہیے"۔

دوحہ پر اسرائیلی حملے کے بعد جاری کردہ بیان میں ٹرمپ نے  قطر۔امریکہ تعلقات کی تعریف کی اور اس  خلیجی ملک کو ایک "عظیم اتحادی" قرار دیا ہے۔

بروز اتوار ، نیو جرسی کی تحصیل  مورِس ٹاؤن سے وائٹ ہاؤس واپسی کے دوران صحافیوں کے ساتھ بات چیت میں انہوں نے کہا ہے کہ"قطر ہمارا ایک بہت بڑا اتحادی رہا ہے۔ وہ ایک بہت مشکل زندگی گزار رہے ہیں کیونکہ وہ درپیش تمام صورتحال کے بالکل وسط  میں ہیں۔ یہی وجہ ہے کہ  ان کا سیاسی حوالے سے  محتاط رہنا ضروری ہے۔ لیکن میں یہ بتاتا چلوں کہ  وہ امریکہ کے  ایک عظیم اتحادی رہے ہیں۔"

صحافیوں کے ،اسرائیلی نسل کُش  بنیامین نیتن یاہو کے لئے،  ٹرمپ کے پیغام  سے متعلق سوال کے جواب میں  انہوں نے اسرائیل کو حملوں میں محتاط رہنے کی تنبیہ کی ہے۔

انہوں نے کہا ہے کہ  "اسرائیل اور دیگر سب کو محتاط رہنا ہوگا۔ ہمیں، انسانوں  پر حملہ کرتے وقت، محتاط رہنا ہوگا۔"

ٹرمپ نے،جمعہ کے روز،  نیویارک میں قطر کےوزیر اعظم شیخ محمد بن عبدالرحمن الثانی کی میزبانی کی۔ خلیجی ملک کے نائب مشن سربراہ نے اس ملاقات کو "بہت موئثر" قرار دیا ہے۔

یہ ملاقات منگل کے روز قطر پر اسرائیلی حملے کے بعد ہوئی، جس میں دوحہ میں حماس کے اعلیٰ رہنماؤں کو نشانہ بنایا گیا تھا۔ اس حملے کی خطے اور اس سے باہر سخت مذمت کی گئی تھی۔

مصالحتی کوششوں میں پیچیدگیاں

ٹرمپ نے حملے کے بعد اسرائیل پر شدید ناراضگی کا اظہار کرتے ہوئے کہا  تھا کہ یہ یکطرفہ کارروائی تھی جو نہ تو امریکی اور نہ ہی اسرائیلی مفادات کو آگے بڑھاتی ہے۔ انہوں نے  کہا ہے کہ انہوں نے اپنے ایلچی' اسٹیو وٹکوف' کو ہدایت دی تھی  کہ وہ قطر کو اس حملے کے بارے میں خبردار کریں۔

قطر نے ٹرمپ کے دعوے کو مسترد کرتے ہوئے کہا تھاکہ انہیں صرف اس وقت خبردار کیا گیا جب حملہ شروع ہو چُکا تھا۔

واضح رہے کہ حملے کے وقت حماس کے ارکان غزہ میں جنگ بندی کے لیے امریکہ کی  پیش کردہ  نئی تجویز پر بات کر رہے تھے۔ اسرائیل اکتوبر 2023 سے جاری بربریت میں اب تک تقریباً 65,000 فلسطینیوں  کو قتل کر چُکا ہے۔

دوحہ پر اسرائیلی حملے نے بنیادی طور پر قطر میں جاری جنگ بندی کی کوششوں کو پیچیدہ بنا دیا ہے۔

قطر، غزہ میں اسرائیل کی طرف سے جاری  نسل کشی کو ختم کرنے کے لیے اہم ثالثوں میں سے ایک رہا ہے۔