چین نے تصدیق کی ہے کہ یورپی یونین کے ساتھ 25 واں اعلیٰ سطحی سربراہی اجلاس بیجنگ میں ہوگا۔
یہ دورہ فریقین کے درمیان سفارتی تعلقات کے قیام کی 50 ویں سالگرہ کے موقع پر ہو رہا ہے۔
خبر رساں ادارے روئٹرز کے مطابق، چینی صدر شی جن پنگ جمعرات 24 جولائی کو یورپی کمیشن کی صدر ارسلا وان ڈیر لیئن اور یورپی کونسل کے صدر انتونیو کوسٹا سے ملاقات کریں گے۔
چین کے وزیر اعظم لی چیانگ چین کی نمائندگی کرتے ہوئے سربراہ ی اجلاس کی صدارت کریں گے۔
توقع ہے کہ فریقین دوطرفہ تعلقات کی صورتحال، اقتصادی تعاون، منڈیوں تک رسائی اور پابندیوں کی پالیسیوں جیسے امور پر تبادلہ خیال کریں گے۔
تعلقات میں کشیدگی جون میں اس وقت بڑھ گئی جب یورپی یونین نے چینی کمپنیوں کو 5 ملین یورو سے زائد مالیت کے ٹینڈرز میں حصہ لینے سے روک دیا تھا۔
اس فیصلے کی وجہ یہ الزامات تھے کہ بیجنگ نے منظم طریقے سے یورپی کاروباری اداروں کے ساتھ امتیازی سلوک کیا اور مقامی منڈیوں تک رسائی کو محدود کیا۔
یہ اجلاس ایسے وقت میں ہو رہا ہے جب یورپی یونین نے روس کے خلاف پابندیوں کے نئے پیکج کا اعلان کیا ہے، اس پیکیج میں چین کے قانونی اداروں اور افراد کے خلاف پابندیاں بھی شامل ہیں۔
اس سے قبل چین کی وزارت خارجہ نے کہا تھا کہ وہ یکطرفہ پابندیوں کی سختی سے مخالفت کرتے ہوئے ان کو اٹھانے کا مطالبہ کرتی ہے۔
واضح رہے کہ اختلافات کے باوجود، بیجنگ بات چیت میں شامل ہونے کے لئے اپنی آمادگی پر زور دیتا ہے.
مئی کے آغاز میں چینی صدر شی جن پنگ نے کہا تھا کہ چین یورپ کے ساتھ تعاون کو مضبوط بنانا اور تجارتی تعلقات میں کشادگی کو فروغ دینا چاہتا ہے۔
