وینزویلا کی وزارت داخلہ نے کہا ہے کہ امریکی حملے میں کم از کم 100 افراد ہلاک ہوئے ہیں۔
وزیر داخلہ دیوُسدادو کابیو نے کہا ہے کہ صدر نکولس مادورو اور ان کی اہلیہ سیلیا فلورز بھی ہفتے کے روز ہونے والے حملے کے دوران زخمی ہوئے تھے ۔ ۔
کابیو نے مادورو، ان کی اہلیہ اور امریکی فوجی کارروائی میں مارے جانے والوں کو خراج تحسین پیش کیا ہے۔
وینزویلا کی فوج نے گزشتہ روز کاراکاس میں ایک اجتماعی رسم جنازہ کے دوران حملے میں مارے گئے درجنوں فوجیوں کی تدفین بھی کی ۔
انہوں نے سرکاری ٹیلی ویژن کو بتایا کہ وینزویلا ہتھیار نہیں ڈالے گا کیونکہ یہ ایک ایسا ملک ہے جس کی تاریخ اور ورثہ ہے ،اب پوری دنیا جانتی ہے کہ نکولس مادورو جنگی قیدی ہیں اور امریکہ نے بین الاقوامی بقائے باہمی کے تمام اصولوں کی خلاف ورزی کی ہے۔
یاد رہے کہ امریکی قوتوں نے ملک کے شمالی حصے میں اہداف پر فضائی حملے کیے، جبکہ اسپیشل آپریشنز فورسز نے ایک خصوصی آپریشن کے نتیجے میں مادورو اور فلوریس کو اغوا کر کے امریکہ پہنچا دیا ہے ۔
نیو یارک کی عدالت میں منشیات اور ہتھیاروں سے متعلق الزامات پر اپنی پہلی سماعت کے دوران مادورو اور فلوریس نے بے گناہ ہونے کا اعلان کیا ہے ۔
