شمالِ مشرقی نائجیریا کے شہر مائدوگیری میں مبینہ خودکش بمباروں کے متعدد دھماکوں سے کم از کم 23 افراد ہلاک اور 100 سے زائد زخمی ہو گئے۔

پولیس کے ترجمان ناہم کینتھ ڈاسو نے ایک بیان میں کہا کہ ابتدائی تفتیش سے معلوم ہوتا ہے کہ یہ دھماکے مبینہ خودکش بمباروں نے کیے  ہیں  جن میں مجموعی طور پر 23 افراد ہلاک  108 زخمی  ہوئے ۔

پولیس نے منگل کی صبح کے ابتدائی بیان میں کہا کہ 'متاثرہ علاقوں میں صورتحال مکمل طور پر بحال کر دی گئی ہے اور  سیکورٹی فورسز نے مائدوگیری اور اس کے مضافات میں اپنی نفری  اور نگرانی بڑھا دی ہے تاکہ مزید واقعات کی روک تھام کی جا سکے۔

بوکو حرام اور حریف دہشت گرد گروپ داعش ویسٹ افریقہ (ISWAP) کے دہشت گردوں نے حال ہی میں شمالِ مشرقی نائجیریا میں حملوں میں اضافہ کیا ہے۔

ملک میں ان کے 16 سالہ دہشت گردانہ  حملوں  نے 40,000 سے زائد افراد کو ہلاک اور تقریباً دو ملین لوگوں کو بے گھر کر دیا ہے۔