ترکیہ نے اتوار کے روز سعودی عرب کے شہر 'رأس تنورہ' میں ہیلی کاپٹر حادثے میں ہونے والے جانی نقصان پر گہرے رنج و غم کا اظہار کیا ہے۔

ترکیہ وزارت  خارجہ نے جاری کردہ  بیان کہا ہے کہ "ہم، اس المناک حادثے میں جاں بحق ہونے والوں کے لیے اللہ تعالیٰ سے رحمت و مغفرت  کے طلبگار  ہیں اور ان کے اہلِ خانہ اور سعودی عرب کے عوام سے دلی تعزیت کا اظہار کرتے ہیں"۔

تیل کے اہم مرکز میں جانی نقصان

سعودی عرب کی تیل کی عالمی شہرت یافتہ کمپنی آرامکو کا ایک ہیلی کاپٹر رأس تنورہ میں گر کر تباہ ہو گیا ہے ۔ سعودی سرکاری خبر  ایجنسی ایس پی اے کے مطابق، ہیلی کاپٹر میں سوار تمام 14 افراد ہلاک ہو گئےہیں۔

ایس پی اے نے سعودی وزارتِ توانائی کے ایک سرکاری ذریعے کے حوالے سےشائع کردہ خبر میں کہا ہے  کہ جاں بحق ہونے والے تمام افراد سعودی شہری تھے۔

سعودی وزارتِ توانائی کے مطابق، ہیلی کاپٹر حادثے میں کم از کم 14 افراد اپنی جانوں سے ہاتھ دھو بیٹھے ہیں۔

آرامکو کا مذکورہ  ہیلی کاپٹر اتوار کے روز سعودی عرب کے مشرقی ساحل پر، آبنائے ہرمز کے مغرب میں واقع رأس تنورہ کے علاقے میں گر کر تباہ ہوا ہے۔

ایس پی اے نے کہا ہے کہ "ہیلی کاپٹر حادثے کی وجوہات معلوم کرنے کے لیے متعلقہ حکام کی شرکت سے تحقیقات جاری ہیں" ۔