ایران کے سپریم لیڈر نے امریکی صدر ڈونلڈ ٹرمپ پر ایرانی جوہری مقامات پر حالیہ امریکی فوجی حملوں کی کامیابی کو بڑھا چڑھا کر پیش کرنے کا الزام لگایا ہے، اور کہا ہے کہ ان حملوں سے کوئی خاص نتائج حاصل نہیں ہوئے۔

علی خامنہ ای نے اتوار کو اپنے سرکاری ایکس اکاؤنٹ پر ایک بیان میں کہا، "امریکی صدر نے واقعات کو غیر معمولی انداز میں بڑھا چڑھا کر پیش کیا، جس سے یہ عیاں ہے کہ  انہیں اس مبالغہ آرائی کی ضرورت تھی۔"

انہوں نے مزید کہا، "جو کوئی بھی ان الفاظ کو سنتا ہے، وہ سمجھ سکتا ہے کہ ان کے پیچھے کچھ  اور حقیقت کار فرما  ہے۔ وہ کچھ نہیں کر سکے اور حقیقت کو چھپانے کے لیے مبالغہ آرائی کی۔"

اس سے قبل، ٹرمپ نے فاکس نیوز کو ایک انٹرویو میں کہا تھا کہ "ہم نے کارروائی  کرتے ہوئے ان کی جوہری صلاحیت کو تباہ کر دیا، پھر ہم رک گئے۔ یہ ایک شاندار کام تھا۔ اور وہ مزید آگے نہیں بڑھ سکتے تھے... یہ 12 دن بہت شدید تھے —بہت شدید۔"

اسرائیل اور ایران کے درمیان تنازعہ 13 جون کو اس وقت شروع ہوا جب اسرائیل نے ایرانی فوجی، جوہری اور شہری مقامات پر فضائی حملے کیے، جن میں ایران کی وزارت صحت کے مطابق کم از کم 606 افراد ہلاک اور 5,332 زخمی ہوئے۔

تہران نے اسرائیل پر جوابی میزائل اور ڈرون حملے کیے، جن میں عبرانی یونیورسٹی آف یروشلم کے جاری کردہ اعداد و شمار کے مطابق کم از کم 29 افراد ہلاک اور 3,400 سے زیادہ زخمی ہوئے۔

امریکہ نے اس  تصادم  کو بڑھاتے ہوئے ایران کی فردو، نطنز اور اصفہان کی جوہری تنصیبات پر بمباری کی۔

یہ   حملے  24 جون کو ایک امریکی حمایت یافتہ جنگ بندی کے تحت ختم ہوئے۔