ترک ڈرامے ثقافتی انفرادیت اور عالمی موضوعات کو یکجا کرتے ہوئے ترکی کے عالمی تاثر کو بدل رہے ہیں۔ لببیلا گاؤنا کی زندگی ایک ترک ڈرامے سے آشنائی کے بعد بالکل مختلف سمت میں چل نکلی۔
ترک ڈرامے نہ صرف تفریحی دنیا میں بلکہ بین الاقوامی سطح پر بھی زبردست اثر ڈال رہے ہیں۔ یہ تخلیقات ثقافتی دولت اور عالمی موضوعات کو یکجا کر کے ترکی کی عالمی شناخت کو ایک نئی شکل دے رہی ہیں۔

ایک مداح کی  زندگی میں انقلابی تبدیلی

لاس اینجلس میں مقیم میکسیکن وائلن نواز لببیلا گاؤنا کا کہنا ہے کہ "دریلیش: ارطغرل" ڈرامے نے اس کی زندگی بدل دی۔ ڈرامے کی موسیقی سے متاثر ہو کر اس نے وائلن پر ایک دھن بجائی، جس کی ویڈیو سوشل میڈیا پر بے حد مقبول ہوئی اور اسے ڈرامے کے سیٹ تک لے گئی۔ گاؤنا کا اس ڈرامے سے متاثر ہونا صرف موسیقی تک محدود نہ رہا؛ بلکہ اس ڈرامے نے اس کی اسلام میں دلچسپی بڑھا دی اور بالآخر وہ مسلمان ہو گئی۔

ثقافتی سرمایہ

ترک ڈرامے دنیا بھر میں ناظرین تک پہنچ رہے ہیں۔ 2022 میں ترکیہ کی  ڈراموں کی برآمدات 600 ملین ڈالر تک پہنچ گئیں۔ ترکیہ، امریکہ اور برطانیہ کے بعد دنیا کا تیسرا سب سے بڑا ٹی وی ڈرامے برآمد کرنے والا ملک ہے۔ 2020 سے 2023 کے درمیان بین الاقوامی طلب میں 184 فیصد اضافہ ہوا، جس کی بدولت ترکیہ دنیا کی دوسری سب سے بڑی ڈرامہ انڈسٹری بن گیا۔

ڈراموں کے فلمائے گئے مقامات، مستند ملبوسات اور موسیقی ناظرین کو مسحور کر دیتے ہیں۔ حقیقی مقامات پر شوٹنگ کیے جانے سے ڈراموں میں فطری پن آ جاتا ہے۔ یہ ڈرامے آفاقی موضوعات پر مبنی ہونے کی وجہ سے مختلف ثقافتوں کے ناظرین کے ساتھ ایک خاص تعلق قائم کر لیتے ہیں۔

ناظرین پر اثرات

تحقیقات سے معلوم ہوتا ہے کہ ترک ڈرامے ترکیہ کے بارے میں پائے جانے والے تعصبات کو کم کر سکتے ہیں۔ ازبکستان سے تعلق رکھنے والی محسوما تاسٹانوا "چالی قوشو" ڈرامے سے متاثر ہو کر استنبول منتقل ہو گئی۔ ترک ڈرامے محض ٹی وی شوز نہیں بلکہ حقیقی زندگی کے قریب تر محسوس ہوتے ہیں۔

ترک ڈرامے محض تفریح کا ذریعہ نہیں بلکہ ترکیہ کے ثقافتی سرمائےکو دنیا بھر میں متعارف کروا رہے ہیں اور لوگوں کے ترکیہ کے بارے میں نظریات کو بدل رہے ہیں۔