امریکی وزیرِ خارجہ مارکو روبیو نے شامی وزیرِ خارجہ اسد حسن الشیبانی سے علاقائی سلامتی اور دونوں ملکوں کے درمیان تعاون میں اضافے کے حوالے سے گفتگو کی۔
محکمہ خارجہ کے ترجمان ٹومی پیگوٹ کے مطابق روبیو نے شامی اقلیتی گروپوں کے مسلسل انضمام کی اہمیت پر زور دیا۔
انہوں نے عالمی ایٹمی توانائی ایجنسی (IAEA) جو جوہری سرگرمیوں کی نگرانی اور جوہری توانائی کے پرامن استعمال کی ترویج کی ذمہ دار ہے، سے شام کے تعاون کو بھی سراہا۔
شامی وزارتِ خارجہ نے ایک بیان میں کہا کہ اس بات چیت میں دونوں ممالک کے باہمی تعلقات اور انہیں مزید فروغ دینے اور تعاون مضبوط کرنے کے طریقوں پر بات چیت ہوئی۔
بیان کے مطابق الشیبانی نے ان کے ملک پر عائد پابندیاں ہٹانے پر امریکہ کا شکریہ ادا کیا۔
بیان میں کہا گیا ہے کہ' اس دوران خطے کی صورتحال اور پیش رفتوں کے ساتھ ساتھ سیاسی اور اقتصادی دونوں سطحوں پر علاقائی استحکام کی حمایت میں شام کے اہم کردار پر بھی گفتگو کی گئی۔'
