وال اسٹریٹ جرنل نے معاملے سے واقف ذرائع کے حوالے سے رپورٹ کیا ہے کہ امریکی صدر ڈونلڈ ٹرمپ کے داماد اور خصوصی نمائندے جیرڈ کشنر نے گزشتہ مہینوں کے دوران بند کمروں میں ہونے والے یوکرین امن مذاکرات میں یہ تجویز پیش کی کہ یوکرین روس کو اپنا علاقہ دے اور اس کے بدلے اسے نیٹو کی رکنیت دی جائے۔
ذرائع کے مطابق ٹرمپ اپنے عوامی بیانات میں یوکرین کی نیٹو رکنیت کو مسترد کرنے کا اشارہ دے چکے ہیں، تاہم اس کے باوجود کشنر اور ٹرمپ کے خصوصی نمائندۂ امن اسٹیو وٹکوف حالیہ اجلاسوں میں اس موضوع کو بار بار اٹھاتے رہے ہیں۔
زیرِ غور دو منظرنامے
ذرائع نے بتایا کہ یہ معاملہ گزشتہ ہفتے ڈبلن میں کشنر اور وٹکوف کی یوکرینی صدر ولادیمیر زیلنسکی کے ساتھ ملاقات میں بھی زیرِ بحث آیا۔
ذرائع کے مطابق امریکا نے حالیہ اجلاسوں میں دو منظرنامے پیش کیے ہیں۔ پہلے منظرنامے کے تحت یوکرین نیٹو کی رکنیت کے بدلے دونباس کے علاقے کا کنٹرول روس کے حوالے کر دے گا۔
دوسرے منظرنامے میں لڑائی اس طرح روکی جائے گی کہ دونباس یوکرین کے پاس ہی رہے، جبکہ امریکہ ا اور یورپی ممالک کے ساتھ طے پانے والے معاہدے کے ذریعے یوکرین کو روسی حملوں کے خلاف سکیورٹی ضمانتیں فراہم کی جائیں گی۔













