آسٹریلوی ایئرلائن قنطاس نے بدھ کے روز اعلان کیا ہے کہ وہ ایک 'اہم' سائبر حملے کی تحقیقات کر رہی ہے، جس میں ہیکرز نے چھ ملین صارفین کے حساس ڈیٹا پر مشتمل نظام میں دراندازی کی۔

قنطاس نے کہا کہ ہیکرز نے اس کے ایک صارف رابطہ مرکز کو نشانہ بنایا اور ایک  تیسرے فریق کے زیر استعمال کمپیوٹر نظام کو اپنے کنٹرول میں لے لیا۔

کمپنی کے مطابق، ہیکرز کو صارفین کے نام، ای میل پتوں، فون نمبروں اور تاریخ پیدائش جیسے حساس معلومات تک رسائی حاصل ہوئی۔

بیان میں کہا گیا، 'اس پلیٹ فارم میں چھ ملین صارفین کے سروس ریکارڈز موجود ہیں۔'

’ہم چوری شدہ ڈیٹا کے تناسب کی تحقیقات جاری رکھے ہوئے ہیں، تاہم ہمیں توقع ہے کہ یہ کافی حد تک اہم ہوگا۔‘

قنطاس نے مزید کہا کہ کریڈٹ کارڈ کی تفصیلات اور پاسپورٹ نمبر اس نظام میں محفوظ نہیں تھے۔’قنطاس کی کارروائیوں یا ایئرلائن  کے تحفظ  پر کوئی اثر نہیں پڑا۔‘

چیف ایگزیکٹو وینیسا ہڈسن نے کہا کہ قنطاس نے آسٹریلیا کے نیشنل سائبر سیکیورٹی کوآرڈینیٹر کو مطلع کر دیا ہے۔

انہوں نے کہا، ’ہم اپنے صارفین سے مخلصانہ معذرت خواہ ہیں اور ہمیں اس غیر یقینی صورتحال کا احساس ہے جو اس سے پیدا ہوگی۔‘

’ہمارے صارفین ہم پر اپنی ذاتی معلومات کے تحفظ کا اعتماد کرتے ہیں، اور ہم اس ذمہ داری کو سنجیدگی سے لیتے ہیں۔‘

ایڈیلیڈ یونیورسٹی کے سائبر سیکیورٹی ماہر کرسٹوفر برونک نے کہا کہ چوری شدہ ڈیٹا شناخت کی چوری کے لیے استعمال ہو سکتا ہے۔

برونک نے کہا، ’چوری شدہ صارف ڈیٹا کی قیمت اس کی مجرمانہ عناصر کے درمیان دوبارہ فروخت کی صلاحیت میں ہے، جو کمپیوٹر کے ذریعے دھوکہ دہی اور متاثرین کے دیگر آن لائن اکاؤنٹس تک رسائی حاصل کرنے میں دلچسپی رکھتے ہیں۔‘

حالیہ برسوں میں بڑے سائبر حملوں کی ایک لہر نے آسٹریلوی شہریوں کے ذاتی ڈیٹا کے تحفظ کے بارے میں خدشات کو بڑھا دیا ہے۔

سائبر سیکیورٹی ماہر رمپا داسگپتا نے کہا، ’آسٹریلیا میں یہ بار بار ہونے والے سائبر حملے ظاہر کرتے ہیں کہ بہت سی تنظیمیں اب بھی سائبر سیکیورٹی کو نظر انداز کر رہی ہیں۔‘

داسگپتا، جو آسٹریلیا کی لا ٹروب یونیورسٹی سے وابستہ ہیں، نے کہا، ’اسے سب سے زیادہ اہمیت دی جانی چاہیے۔‘

قنطاس نے 2024 میں معذرت کی تھی جب اس کی موبائل ایپ میں ایک خرابی نے کچھ مسافروں کے نام اور سفری تفصیلات ظاہر کر دی تھیں۔

2023 میں آسٹریلیا کی 40 فیصد مال برداری  کی خدمات ادا کرنے والی  بندرگاہوں کی کارروائیاں اس وقت رک گئیں جب ہیکرز نے ڈی پی ورلڈ کے کمپیوٹرز میں دراندازی کی۔

2022 میں روسی ہیکرز نے آسٹریلیا کے سب سے بڑے نجی صحت بیمہ کنندگان میں سے ایک کے ڈیٹا تک رسائی حاصل کی، جس میں نو ملین سے زائد موجودہ اور سابق صارفین کا ڈیٹا شامل تھا۔

اسی سال ٹیلی کام کمپنی آپٹس کو بھی ایک بڑے ڈیٹا لیک کا سامنا کرنا پڑا، جس میں 9.8 ملین افراد کی ذاتی تفصیلات تک رسائی حاصل کی گئی۔