حکام نے بتایا  ہے کہ بھارتی  ریاست اتر پردیش میں کئی روز کی موسلادھار بارش اور سیلاب کے بعد کم از کم 62 افراد ہلاک ہو گئے ہیں ۔

ریاستی حکومت نے پیر کو کہا کہ تین روز کی شدید بارش سے کئی اضلاع میں سیلاب آیا، جس کے نتیجے میں 46 افراد زخمی ہوئے  اور 1,000 سے زیادہ مکانات کو نقصان پہنچا۔

ریاستی دارالحکومت لکھنؤ سمیت   بعض علاقوں میں پیر کو اسکول بند کر دیے گئے، جبکہ ریسکیو ٹیموں نے سیلاب زدہ علاقوں سے لوگوں کو محفوظ مقامات پر منتقل کیا۔ رہائشیوں کو پانی بھرے راستوں سے غیر ضروری سفر سے گریز اور تیز بہنے والی ندی، نالوں سے دور رہنے کی ہدایت کی گئی۔

لکھنؤ کے علاقائی موسمیاتی مرکز کے سائنسدان اتل کمار سنگھ نے کہا کہ خلیج بنگال پر موجود موسمی نظام کمزور ہونے کے باعث  پیر سے بارشوں میں کمی آنے  کی توقع ہے۔ انہوں نے کہا کہ ریاست کے مشرقی اور مغربی حصوں میں منگل تک ہلکی بارش جاری رہ سکتی ہے۔

سیلاب نے مشرقی ریاست اوڈیسا کو بھی متاثر کیا، جہاں حکام کے مطابق 75,000 سے زائد افراد کو محفوظ مقامات پر منتقل کیا گیا۔

اس ریاست کے پڑوس میں واقع نیپال میں، ملک کی آفت مینجمنٹ ایجنسی نے بتایا کہ جمعرات سے اتوار تک موسمی واقعات کے باعث 21 افراد ہلاک  اور 5 زخمی ہوئے۔

پانچ افراد لاپتہ ہیں ، جبکہ سیلابوں اور لرزشِ اراضی  سے 194 مکانات کو نقصان پہنچا ہے۔