جمعرات کی صبح کیف پر ایک بڑے میزائل حملے میں کم از کم نو افراد ہلاک اور 60 سے زائد زخمی ہو گئے، یوکرین کی ریاستی ایمرجنسی سروس نے بتایا۔ یہ تین سالہ جنگ کے دوران دارالحکومت پر ہونے والے مہلک ترین حملوں میں سے ایک تھا۔
یوکرینی حکام نے میزائل حملے کے لیے الرٹ جاری کیا، اور اے ایف پی کے صحافیوں نے دارالحکومت میں دھماکوں کی آوازیں سنیں۔ یوکرین کی ریاستی ایمرجنسی سروس نے ٹیلیگرام پر بتایا، "روس نے کیف پر ایک بڑا مشترکہ حملہ کیا ہے۔" ابتدائی معلومات کے مطابق، نو افراد ہلاک اور 63 زخمی ہوئے ہیں۔" مزید بتایا گیا کہ 42 زخمیوں کو اسپتال منتقل کیا گیا، جن میں چھ بچے شامل ہیں۔
انہوں نے کہا کہ دارالحکومت کے پانچ اضلاع میں نقصان ہوا، جن میں گیراجز اور انتظامی عمارتوں میں آگ لگنے کے واقعات شامل ہیں، جو بجھا دی گئی ہیں۔ ریاستی ایمرجنسی سروس نے کہا کہ حملے سے رہائشی عمارتوں کو بھی نقصان پہنچا ہے۔ "ملبے کے نیچے لوگوں کی تلاش جاری ہے۔"
اے ایف پی کے ایک صحافی کا کہنا ہے کہ ایک رہائشی عمارت کے تہہ خانے میں قائم بم شیلٹر میں، فضائی حملے کے الرٹ کے بعد ایک درجن سے زائد رہائشیوں نے پناہ لی ۔ باور رہے کیف کو آخری بار اپریل کے اوائل میں میزائلوں سے نشانہ بنایا گیا تھا، جب کم از کم تین افراد زخمی ہوئے تھے۔ فروری 2022 میں روس کے مکمل حملے کے آغاز کے بعد سے، کیف وقفے وقفے سے حملوں کا نشانہ بنتا رہا ہے۔
یوکرین کے مشرق میں، شہر خرکیف کو جمعرات کی صبح سات میزائلوں سے نشانہ بنایا گیا، شہر کے میئر ایگور تیریکوف نے بتایا کہ ان کا علاقہ "ایک ہی رات میں دوسری بار کروز میزائلوں کے حملے کی زد میں ہے۔" "حالیہ حملوں میں سے ایک نے ایک گنجان آباد رہائشی علاقے کو نشانہ بنایا جہاں متعدد افراد زخمی ہوئے۔ دشمن کے حملوں کے مقامات کا معائنہ جاری ہے،" تیریکوف نے شہر کے رہائشیوں سے "احتیاط برتنے" کی اپیل کی۔
یوکرین کے صدر وولودیمیر زیلنسکی کے اعلیٰ معاون آندری یرماک نے کہا کہ روس اس وقت کیف، خرکیف اور دیگر شہروں پر میزائلوں اور ڈرونز سے حملے کر رہا ہے۔انہوں نے کہا، "پوتن صرف قتل و غارت کے درپے دکھائی دے رہے ہیں، شہریوں پر حملے بند ہونے چاہئیں۔"
