امریکہ نے کہا ہے کہ "ہم  نے ایران کے جنوبی علاقے میں متعدد حملے کئے ہیں جن میں میزائل لانچر والے مقامات اور بارودی سرنگیں بچھانے والی ایرانی کشتیوں کو نشانہ بنا یا گیا ہے۔

امریکی سینٹرل کمانڈ 'سینٹ کوم' کے ترجمان  ٹِم ہاکنز نے فوکس نیوز سے گفتگو میں کہا ہے کہ "امریکی فوج نے آج ایرانی فوج  کے پیدا کردہ خطرات کے مقابل  اپنے فوجیوں کے تحفظ کے لیے جنوبی ایران میں دفاعی نوعیت کے حملے کیے ہیں"۔

ہاکنز نے کہا ہے کہ اہداف میں میزائل فائرنگ کے مقامات اور بارودی سرنگیں بچھانے کی کوشش میں مصروف  ایرانی کشتیاں شامل تھیں۔ امریکی سینٹرل کمانڈ جاری جنگ بندی کے دوران تحمل کا مظاہرہ کرتے ہوئے اپنی افواج کا دفاع جاری رکھے ہوئے ہے"۔

ہاکنز نے حملوں کی مزید تفصیلات فراہم نہیں کیں  تاہم ایرانی ذرائع ابلاغ  نے پیر کی صبح  شائع کردہ خبر میں کہا ہے  کہ جنوبی ایران کے شہر بندر عباس اور خلیجی ساحل کے قریب واقع سیرک اور جاسک کے علاقوں میں دھماکوں کی آوازیں سنی گئی ہیں۔

ایران کی نیم سرکاری 'فارس خبر ایجنسی'  نےکہا ہے کہ بندر عباس کے مقامی رہائشیوں نے کئی دھماکوں کی آوازیں سنیں تاہم ابتدائی طور پر دھماکوں کی درست جگہ اور نوعیت واضح نہیں ہو سکی۔

ایجنسی نے مزید کہا ہے کہ ایران کے خلیج فارس سے متصل جنوبی علاقوں سیرک اور جاسک کے اطراف میں بھی بیک وقت اسی نوعیت کی آوازیں سنی گئی ہیں۔

نیم سرکاری مہر خبر ایجنسی کے مطابق کارروائیوں کے بعد بندر عباس کے بندرگاہی شہر میں صورتحال قابو میں ہے۔