فلسطینی مزاحمتی گروپ حماس نے ہفتے کے روز ایک تصویر جاری کی جس میں 47 اسرائیلی قیدی دکھائے گئے ہیں۔ حماس کا کہنا ہے کہ یہ تصویر غزہ شہر میں اسرائیل کی تازہ ترین فوجی کارروائی کے آغاز پر لی گئی تھی۔

تصویر کے ساتھ عربی اور عبرانی زبان میں ایک کیپشن بھی شامل تھا جس میں لکھا تھا: ” نیتن یاہو کی ہٹ دھرمی اور چیف آف جنرل اسٹاف ایال زامیر کی  طرف سے اس کی اطاعت کے باعث، یہ غزہ میں آپریشن کے آغاز پر الوداعی تصویر ہے۔“

حماس نے یہ تصویر اپنی سرکاری ویب سائٹ پر شائع کی، جس سے یہ ظاہر ہوتا ہے کہ قیدیوں کی قسمت اسرائیلی قیادت کے سیاسی فیصلوں سے جڑی ہوئی ہے۔

حماس نے بارہا اپنی آمادگی ظاہر کی ہے کہ وہ اسرائیل کے ساتھ ایک جامع معاہدہ کرنے کے لیے تیار ہے، جس کے تحت تمام اسرائیلی قیدیوں کو فلسطینی قیدیوں کے بدلے رہا کیا جائے، غزہ پر جنگ ختم کی جائے، اور اسرائیلی افواج کا مکمل انخلا یقینی بنایا جائے۔

تاہم، نیتن یاہو نے بارہا ایسے تجاویز کو مسترد کیا ہے اور اس کے بجائے جزوی انتظامات پر اصرار کیا ہے، جس سے وہ مذاکرات کے ہر مرحلے میں تاخیر اور نئی شرائط عائد کر سکتے ہیں۔

اسرائیل اور دیگر جگہوں پر کئی افراد نے نیتن یاہو پر الزام لگایا ہے کہ وہ اپنی سیاسی بقا کے لیے جنگ کو طول دے رہے ہیں اور قیدیوں کی زندگیوں کو نظر انداز کر رہے ہیں۔

9 ستمبر کو، اسرائیل نے دوحہ میں ایک رہائشی کمپاؤنڈ پر حملہ کیا، جس میں حماس کے پانچ رہنما مارے گئے۔ یہ رہنما غزہ میں جنگ کے خاتمے کے لیے امریکی تجویز پر بات چیت کر رہے تھے۔ اکتوبر 2023 سے اب تک تقریباً 65,000 فلسطینی اس جنگ میں جاں بحق ہو چکے ہیں۔

گزشتہ نومبر میں، بین الاقوامی فوجداری عدالت نے نیتن یاہو اور ان کے سابق وزیر دفاع یوآو گیلنٹ کے خلاف غزہ میں جنگی جرائم اور انسانیت کے خلاف جرائم کے الزامات میں وارنٹ گرفتاری جاری کیے۔

اسرائیل کو غزہ پر اپنی جنگ کے لیے بین الاقوامی عدالت انصاف میں نسل کشی کے مقدمے کا بھی سامنا ہے۔