ترکیہ صدارتی محکمہ اطلاعات کے سربراہ ' فخرالدین آلتون' نے،اسرائیلی فضائی حملوں میں ' آئی ایچ ایچ' ہیومینیٹیرین ریلیف فاؤنڈیشن کے 5 امدادی کارکنوں کے شہادت پر، امدادی تنظیم سے تعزیت کا اظہار کیا ہے ۔
29 مئی بروز جمعرات سوشل میڈیا پلیٹ فارم 'ایکس' سے جاری کردہ بیان میں آلتون نے کہا ہے کہ اسرائیلی حکومت، بچوں، عورتوں ، نوجوانوں اور ضعیفوں کی تفریق کئے بغیر نسل کشی کی حدوں تک پہنچی ہوئی دہشت گردی کر رہی ہے ۔ اسرائیلی حملوں میں قتل کئے گئے یہ امدادی کارکن اپنی جانیں خطرے میں ڈال کر علاقے میں ضروری امداد فراہم کر رہے ہیں۔
آلتون نے کہا ہے کہ"صیہونی اسرائیلی انتظامیہ غزہ میں منظم قتل عام جاری رکھے ہوئے ہے اور اب یہ قتل عام اس حد تک پہنچ چکا ہے کہ بے گناہ امدادی کارکنوں کو بھی نشانہ بنایا جا رہا ہے۔ یہ کارکن محصور غزہ کے لوگوں تک ایک لقمہ روٹی اور ایک گھونٹ پانی پہنچانے کے لیے اپنی جانیں خطرے میں ڈال کر امدادی کام کر رہے ہیں۔"
آلتون نے عالمی برادری سے اپیل کی ہے کہ وہ اس ظلم کو روکنے کے لیے آواز بلند کرے اور ٹھوس اقدامات کرے۔
انہوں نے کہا ہےکہ ترکیہ، سفارتی ذرائع اور بین الاقوامی اداروں کے ذریعے، غزہ میں خونریزی کو روکنے اور نسل کُشی کے ذمہ داروں کو انصاف کے کٹہرے میں لانے کے لیے کوششیں جاری رکھے گا۔
اپنی جانوں کو خطرے میں ڈال کر مدد پہنچانا
واضح رہے کہ ترکیہ کی امدادی تنظیم 'آئی ایچ ایچ' غزہ میں اقوام متحدہ کے ورلڈ فوڈ پروگرام'ڈبلیو ایف پی' کے ساتھ مربوط شکل میں کام کر رہی ہے۔
تنظیم نے جاری کردہ بیان میں کہا ہے کہ امدادی کارکن غزہ میں جاری اسرائیلی فوجی حملوں کے دوران محصور شہریوں تک خوراک اور سامان پہنچانے کی کوششوں میں مصروف تھے۔ہم، اپنے امدادی کارکنوں پر کئے گئے اس گھناؤنے حملے کی سخت مذمت کرتے ہیں"۔
فضائی حملوں میں شہید ہونے والے امدادی کارکنوں کی شناخت محمد المبید، احمد بستان، معتز رجب، اسحاق الطیف اور جمال المبید کے طور پر ہوئی ہے۔
